nuummi naluttarfik
Meeqqat inuusuttullu aappaagu akeqanngitsumik nalussinnaassapput
Illoqarfiit pingaarnersaata aappaagumiit 18-it inorlugit ukiulinnut naluttarfimmut ulluinnarni ulloqeqqata kingorna iserneq akeqarunnaartinnissaa eqqunniarpaa
Kommuneqarfik Sermersuup assigiimmik atugassaqarnissamut politikkimi suliniutaanut atatillugu, kommunalbestyrelsi aalajangerpoq, meeqqat inuusuttullu 18-it inorlugit ukiullit 2016 aallarnerfigalugu nalukkiaraangamik ulluinnarni akiliisassanngitsut.
- Ilaqutariilli ilaat illoqarfimmi innuttaasunut nukarlernut sunngiffimmi sammisassaqartitsinissaminnut ajoraluartumik piffissaqarneq ajorput tamannalu pitsaavallaanngilaq, tassami meeqqat inuusuttuaqqallu tamarmik ikinngutitik peqatitillu peqatigalugit aalanissamut periarfissaqarnissaannut illoqarfimmi meeqqanut ataatsimoorfimmullu tamanna pingaaruteqarmat, aalajangiinermut atatillugu kommuni taama tusagassiorfinnut nalunaaruteqarpoq.
Atuaruk: Sermersuup missingersuutit akerliusoqarani akuerai
Assigiinnerulersitsissaaq
Kommunip aningaasaateqarnikkut assigiinngissuseq suliniummik 'Kikkunnut tamanut periarfissat assigiit’ taaguusikkamik millisarniarpaa, akeqanngitsumillu nalussinnaalerneq tassunga attuumassusilittut isigineqassaaq.
Ukioq 2016 tamaat sapaatit akunneri tamaasa ataasinngornermiit tallimanngornermut 18-it inorlugit ukiullit naluttarfimmi Malimmi ulloqeqqaniit matunissaata tungaanut akeqanngitsumik nalukkiarsinnaassapput.
Akeqanngitsumik naluttarneq annertusineqartoq
Nuummi meeqqat pingasut tikillugit ukiullit akeqanngitsumik nalukkiarsinnaasimapput, maannakkulli meeqqat inuusuttuaqqallu 17-it angullugit ukiullit akeqanngitsumik naluttarfimmi periarfissanik atuisinnaalerput.
Sisamanngornikkut nalunaaqutaq ulloqeqqaniit sisamat tungaanut utoqqalinersiallit aamma akeqanngitsumik isersinnaapput.
Atuaruk: Kanukokap Nuummit anissanerluni eqqartorpaa