Meeqqat inuunermik ulorianartorsiortillugit sumiginnakkat

Sermitsiaq.AG-p ippassaq allaaserinninneratut, meeqqat inuusuttullu ikiortariallit nunatsinni kommunit nukissaqarnerpaannit annertuumik sumiginnarneqartarput.

Sumiiffinniillu tamanit Nuummi nukissat amerlanerpaallutillu ilinniarsimasunik sulisoqartoq, ajornartorsiutit annerpaat ilagaat.

- Annermik Nuummi sulianik suliaqarnermi nalinginnaasumik aallaqqaasiilluni ajornartorsiutip sorpiaaneranik aalajangiussineq, aamma qanoq qaqugulu ajornartorsiutitut aalajangiussap isumaginnittoqarfiup aalajangiiffi-gisinnaasai atorlugit aaqqiiviginiarnerata allaaserinera amigaataapput, nakkutilliinermit nalunaarusiami isornartorsiortumi tamanna allaqqavoq.

Oqalunneq timitaliinertaqanngitsoq
Nakkutilliinermit nalunaarusiaq misissoraanni, Nuummi iliuuseqarani oqaluinnartoqartupilussuuneranik ersersitsisoqarpoq.

- Allappallaartoqarlunilu oqaluttoqarpallaarpoq, iliuuserisallu ikippallaarlutik kingusippallaarlutillu, nalunaarusiami allaqqavoq.

Suliani ernumanartuni allaat tamanna pisarpoq, meeqqat ajoquserneqarnissaat imaluunniit inuunerminnik ulorianartorsiortillugit, nakkutilliinermit nalunaarusiaq inerniliivoq.

Aammattaaq suliat paasineqarput, meeqqat annertuumik kinguaassiutimikkut atornerlunneqartut imaluunniit nakuuserfigineqartut kommunip unitsissimanngikkai - imaluunniit unitsinniarsarisimanngikkai.

Annilaarluni qisuariarnerit
Periusissatut pilersaarut iluameersoq amigaataammat, amerlasuutigut kiisami iliuuseqartoqartillugu annilaartutut qisuariartoqartarpoq. Piffissami tassani ajornartorsiutit amerlasuutigut ingasatsereertarput.

- Imaappoq, iliuuseqarnissamut piumasaqaat annertungaarmat, inatsiseqarneq qiviaqqaarnagu ingerlaannaq iliuuseqartoqartarpoq, qanoq akeqarnissaa eqqarsaatiginagu (...) aamma ungasissumut pilersaarusiortoqarani, nalunaarusiami naqissuserneqarpoq.

Angajoqqaarsiaqartitsinerit misissorneqarneq ajortut
Kommunilu iliuuseqareeraangat, meeqqat angajoqqaarsianut inissinneqaraangata pitsaanerungaarneq ajorpoq. Amerlanertigut nammineq ingerlatinneqartarput.

Tassami inissiineq pissusissamisut ingerlanersoq misissorneqarneq ajorpoq.

- Suliani toqqakkani uppernarsaateqanngilaq, ingerlatsiviup paarsinissamik akuersissuteqartoqareernerata kingorna nammineerluni suliniuteqarnermigut qularnaarsimaneraa, paarsineq paarsinissamik akuersissute-qaammi naatsorsuutigineqartutut ingerlanersoq, nalunaarusiami allaqqavoq.

Meeqqanik innarliisimannginnermut uppernarsaateqanngitsut
Tamanna ernumanareertigisorlu kommunip angajoqqaarsiaasut meeqqanik innarliisimannginnerannik uppernarsaateqarnerat iluamik paasisimasaqarfiginngilaa.

Nakkutilliinermik ingerlatsiviup ilimagaa meeqqanik innarliisimannginnermut uppernarsaatit pissarsiarineqarsimassasut, kisianni allaffissornikkut tukattumik ingerlasoqarnerani nassaarineqarsinnaanatik, naak nakkutilliinermik ingerlatsiviup piumasimagaluarai.

Nuummi suliat ernumanartut ataatsimut isigalugit suliarineqarneri 'illersorneqarsinnaanngitsoq', nakkutilliinermik ingerlatsivik isumaqarpoq.