Meeqqat Inuunerissut pillugit filmi piviusulersaarut nutaaq

Meeqqat Inuunerissut/Bedre Børnelivip suliniutaa ”Kuseriarnerup siaruarneratut” nunatsinni illoqarfinnut assigiinngitsunut qulinut tikeraarsimasoq filmilioqatigiinnit ukiut kingulliit pingasut ingerlaneranni malinnaavigineqarpoq.

Meeqqat Inuunerissut containeriutini tungujortut aallaavigalugit inuit meeqqat inuunerannik pitsanngortitserusuttut pikkorissartittarlugit unnukkullu oqallittittarsimavai.

Suliniummi pingaartinneqartut tassaapput meeqqat pisinnaatitaaffii, sumiginnagaaneq kiisalu piumassutsimik sulineq, sullinniakkanut taakkununnga allannguititsisinnaasoq, Meeqqat Inuunerissut tusagassiorfinnut nalunaarummi allappoq.

Piviusulersaarut KNR-TV-mi

Suliniummi illoqarfinni piumassutsimik sulisut Meeqqat Inuunerissunit qanoq sullinneqarsimanerat qanorlu tamattaalluta meeqqanut allannguisitsisinnaanersugut filmimi oqaluttuaralugu takutinneqarpoq. Piviusulersaarut KNR-TV-mi marsip 24-ani nal. 19.30 takutinneqassaaq marsillu 25-ani nal. 20.30 aallakaateqqinneqassalluni.

Suliniut Villum Fondenimit 10 millioner koruuninik pissarsivoq aammattaaq suliffeqarfiit uku tapersersortigalugit STARK Kalaallit Nunaat, Nuuks Auto, Nukissiorfiit, Royal Arctic Line.