pilluaritsi
Meeqqat inuunerissut aningaasanik tunissutisipput
Grønlandsbanken suliniaqatigiiffimmut Meeqqat Inuunerissumut aningaasani tunniussaqarpoq
Grønlandsbanken aamma ukiormanna sullitaminut niuernikkullu attavigisaminut julekortinik nassiussuinianngilaq. Taarsiullugu aningaasat siunertamut pitsaasumut tunniuppaat tigusorlu tassaavoq suliniaqatigiiffik Meeqqat Inuunerissut.
- Taamaattunik tunineqarluni nuanneqaaq. Aningaasat Grønlandsbankimeersut ilaatigut meeqqat pisinnaatitaaffii inersimasutullu nammineq akisussaaneq pillugit innuttaasunik qaammarsaanermut atorneqassapput. Suliassaq tamanna maannakkut suliniutitsinnut naapertuulluinnarpoq, MIBB-imilu ingerlatsiviit allat peqatigalugit meeqqat inuusuttullu pillugit suliniutigineqartunut allanut attuumassuteqarluni, MIBB-ip siulittaasua Katrine Hjelholt Nathanielsen oqarpoq.
Aningaasat kikkunnut tunissutigineqarnissaat aningaaserivimmi sulisut aalajangersimavaat.
- Kalaallit Nunaata tamarmi aningaaserivigimmatigut nunami inooqataaffigalugulu inuuniarfigisatsinni inuiaqatigiit ineriartornerannut peqataallutalu tapersersuinissarput pissusissamisoorluinnarpoq. Allagaaqqat juullimut pilluaqqussutit sipaarnerisigut Kalaallit Nunaanni meeqqat inuunerinnerulernissaannut ukiormanna peqataasinnaalerpugut. Uangalu qularutiginngilara tamanna sullittakkatta niueqatigisartakkattalu paasilluarumaaraat, inuinnarnik sullissisarnermut pisortaq Peter Petersen oqarpoq.
Grønlandsbanki aamma siorna allagaaqqat atorlugit juullimi pilluaqqusinermut taarsiullugu aningaasanik tunissuteqarnikuuvoq. Siorna aningaasat Neriuffimmut tunissutigineqarnikuupput.