Meeqqat internettertarnerat misissuiffigineqalersoq

Meeqqat Isummersortarfiata misissuinera siulleq MIO-p, ’Meeqqat Inuusuttullu Oqaloqatigiinnittarfiat’, ingerlatilerpaa.

Misissuiffiginiagaat tassaavoq meeqqat inuusuttullu computerip saavanut ingikkaangata silarsuarmullu piviusungatitamukaraangata susoqartarnersoq?

- Ullumikkut nunatsinni meeqqat inuusuttullu internetimik atuisarnerannik suli misissuisoqarnikuunngilaq. Taamaammat MIO apersuinikkut misissuinermik piareersaasimavoq, maannalu nunatsinni 6. - 7. klassini ingerlanneqaleruttorpoq.

- Kalaaliusugut inoqatinut attaveqaatit soorlu Facebook, Twitter aamma Snapchat atorluartaqaagut. Maanna MIO-p misissorusuppaa tamanna meeqqanut inuusuttunullu qanoq sunniuteqartarnersoq, MIO ulluni makkunani immersugassatigut misissuinernik nunatsinni 6. - 7. klassinut tamanut nassiussuisoq allappoq.

MIO-mi malillugu meeqqat ataatsimoornernit ajattugaasut interneti aqqutigalugu meeqqanik allanik klassimit allaniit ikinngutitaarsinnaapput, kiisalu illoqarfigisamik aamma nunagisamik avataaniittut ikinngutitaarisinnaanerannut periarfissaqarluarput pitsaalluinnartumik. Meeqqat aammattaaq profilitik aqqutigalugit attaveqaatigisartakkatik pingaarutillit atatiinnarsinnaavaat, ikinngutitik qimallugit allamut nuukkaluarunik imaluunniit ilaqutariit avissaaraangata meeqqallu angajoqqaani marluutillugit ulluinnarni qanimut attavigisinnaanngippagit.

Kisianni aamma MIO nangilluni allappoq meeqqat internettimik atuinerat unamminartortaqartoq.

- Ullumikkumut meeqqat internetimik atuinerat pillugu misissuisoqarsimanngilaq. Uagut angajoqqaatut meeqqanillu sullissisartutut meeqqagut internetimi misilittagaat – pitsaasut ajortullu pillugit ikiussagutsigit, meeqqat silarsuarmi piviusungatitami inuunerat pillugu ilisimasaqarnerusariaqarpugut. Taamaammat MIO-p ulluni makkunani immersugassatigut misissuineq nunatsinni 6. - 7. Klassinut tamanut nassiussuuppaa.

- Misissuinernit aamma MIO-p SMS-ikkut siunnersuisarfianut saaffiginnittarnernit ilisimaarivarput meerarpassuit qinngasaarneqartartut aammalu ataatsimoornermut ilaatinneqarneq ajortut. Ajoraluartumik annikitsuaraannarmik ilisimasaqarfigaarput qanoq annertutigisumik silarsuarmi piviusungatitami qinngasaaruttarneq qanoq annertutigisumik ingerlanneqartarnersoq, assimmi narrunnatsannartut oqaasipiluillu meeqqat internetikkut profiliisigut siuaruaanneqartarput. Silarsuarmi piviusungatitami nikassaarinnittarneq angajoqqaanit meeqqanillu sullissisartunit paasisaqarfiginissaa sapernarpoq, taamaammallu MIO-mi Meeqqat Isummersortarfiata maanna meeqqat silarsuarmi piviusungatitami misigisartagaat apersuutigaat, MIO allappoq.

MIO-p aamma misissuiffigaa meeqqat nuanniitsumik internetikkut assit filmillu nakuusernermik imaluunniit pornomut tunngasut atorlugit eqqunngitsuliorfigineqartarnermik misigisaqartarnersut.

- Aamma paasiniaaffigaarput meeqqat kisimiillutik misigisatik tamakku iluminni aaqqinniarlugit suliarisarneraat imaluunniit ilaquttatik, ilinniartitsisutik allallu inersimasut oqaluttuuttarneraat. MIO allappoq.