MIO
Meeqqat illersuisuata Tasiilamut tikeraarnissani siuartippaa
Aviâja Egede Lynge aatsaat 2017-imi Tasiilamut tikeraartussaagaluarpoq. Isumaginninnikkulli ajornartorsiuteqarnerujussuarnik allaaaserisaq pissutigalugu tikeraarnissani siuartippaa
Tasiilami meeqqat affaasa isumaginninnikkut ajornartorsiuteqarnerannik Sermitsiaq.AG-p apriilip 4-aanni allaaserisaa pissutigalugu meeqqat illersuisuat Aviâja Egede Lynge ernumaammerujussuarpoq.
Paasissutissallu tamakkua pissutigalugu taassuma Tasiilamut tikeraarnissani siuartippaa.
Nammineq takullugu
– Nalunngilara Kommuneqarfik Sermersooq Namminersorlutillu Oqartussat meeqqanut sumiginnagarpassuarnut aaqqiissutissarsiortut, tamannalu tapersersorpara. Uannulli Meeqqat Illersuisuattut pingaaruteqarpoq meeqqat inuusuttullu inuuniarnermi atugarisaat pillugit nammineq kiinarsillugit oqaloqatiginissaat, Aviâja Egede Lynge tusagssiorfinnut nalunaarutikkut erseqqissaavoq.
Meeqqat illersuisuiata Meeqqanut Siunnersuisoqatigiit suleqatigalugit pilersaarutigisimavaa aatsaat 2017-imi Tunumut tikeraarniarluni. Meeqqat Illersuisuata neriuutigaa Tasiilamut tikeraarnini pissutsinut, tusagassiorfitsinut allaaserineqartunut, qulaajaatitseqataassasoq, taamaasilluni kommuni Namminersorlutillu Oqartussat, illoqarfimmi meeqqanut suliniutiginiagaannut pitsaanerusumik siunnersorsinnaajumallugit.
Meeqqat Illersuisuat qaammat una Kommune Kujallermut angalassaaq.