Kommune Kujalleq

Meeqqat illersuisuata Kujataani meeqqat atugaat ernummatigai

Meeqqat Illersuisuata ataatsimut naliliinerani allaaserineqarput, Kommune Kujallermi meeqqat atugarissaassusiisa, inerikkiartornerisa pisinnaatitaaffiisalu Naalagaaffiit Peqatigiit meeqqat pillugit Isumaqatigissutaata qularnaarnissaannut naleqqiullugu ernumanartinneqartut arlallit

Aviâja Egede Lynge
Meeqqat Illersuisuata ataatsimut naliliinerani allaaserineqarput, Kommune Kujallermi meeqqat atugarissaassusiisa, inerikkiartornerisa pisinnaatitaaffiisalu Naalagaaffiit Peqatigiit meeqqat pillugit Isumaqatigissutaata qularnaarnissaannut naleqqiullugu ernumanartinneqartut arlallit

Siorna oktobarimi ,eeqqat pisinnaatitaaffii pillugit sullissivik MIO Kommune Kujallermiippoq meeqqat inuusuttullu inuunerminni atugarisaat nalilerumallugit.

Angalanerup siunertaa aamma meeqqat illersuisuata naliliineri angalanermit nalunaarusiami allaaserineqarput, tamatumani Kommune Kujalliup Naalagaaffiit Peqatigiit Meeqqat pillugit Isumaqatigiissutaannik qanoq maleruaatiginera allaaserineqarluni.

Kommunimilu meeqqat atugaasa ataatsimut nalilerneqarnerat Aviâja Egede Lynge naapertorlugu 'ernumanarput'.

Atuaruk: Meeqqanut atugassarititat Naalagaaffiit Peqatigiit paasisimasaqarneruffigilerpaat

Unammilligassat arlallit
- Kommunimi unamminartut qulequtakkaarlugit sisamanngorlugit immikkoortiterneqarput: Meeqqat illersorneqarnissaat, sutigut tamatigut ikiorserneqarnissaat, angajoqqaat akisussaaffii, ineriartorneq ilinniarnissarlu, sunngiffimmi periarfissat, meeqqat pisinnaatitaaffii pillugit sullissivik tusagassiuutinut nalunaarummi allappoq.

Meeqqat illersuisuata aamma meeqqat pillugit siunnersortip meeqqat, inuusuttut inersimasullu oqaloqatigivaat, taakkununnga ilanngullugit angajoqqaat, sulisut politikerillu – innuttaasunit saaffiginnissutit katillugit 140-t. Aammattaaq pisinnaatitaaffiit pillugit meeqqat 160-it peqatigalugit sammisaqartitsisoqarpoq.

Inassuteqaatit arlallit
Nalunaarut inassuteqaatinik ersarissunik arlalinnik imaqarpoq, naggasiunneqarluni nalinginnaasumik inassuteqaat, tassaalu kommunimi meeqqat inuusuttullu tapersernissaannut tunngavigisani aallaaviusariaqartoq assigiimmik periarfissaqartitaanissamik tunngavik (peqqissaanikkut sullissinernut, atuartitaanissamut, illersugaanissamut il.il.), ammasuunissaq siuarsartariaqartoq aamma paquminarunnarsaasoqartariaqartoq, kiisalu meeqqat inuusuttullu imminnut tunngasunik aalajangiisoqassatillugu peqataatinneqartariaqartut.

- Angalanermit nalunaarusiamut tapertaavoq meeqqat pillugit nalunaarusiaq, meeqqat inuunerminni pissutsit pillugit toqqartumik oqaatigisaannik imaqartoq. Paasissutissat inunnut ataasiakkaanut tunngasut tamarmik inuttaat ilisarsaajunnaarsagaapput. Nalunaarusiat tamarmik Kommune Kujallermut saqqummiunneqarput. Pingasunngornermi tamanut ammasumik Qaqortumi katersortarfimmi tusagassiorfinnut katerisimaartitsissaaq, MIO ilisimatitsivoq.

Atuaruk: Politiit MIO-lu: Aningaasarsiffimmi meeqqat eqqaamakkit

Powered by Labrador CMS