Meeqqat Illersuisuata DHI-mi pissutsit pitaaneruleqquai

Dronning Ingridip napparsimavissuani meeqqat uninngasarfiat meeqqanik assingiinngitsunik nappaatilinnik, soorlu kræftertunik, gigtertunik aamma uummalluttunik, allanillu nappaateqartunik Kalaallit Nunaaneersunik uniffigineqallattaavoq.

Meeqqat ilarpassuisa angajoqqaavisa meeqqatik uneqatigisarpaat, Meeqqalli uninngasarfianni tattoqisaattoqarmat Kalaallit Nunaata meeqqat pisinnaatitaaffiinik qulakkeerinnittoqassagaluarpat pissutsit ajorluinnartutut taaneqassagaluarput.

Meeqqat uninngasarfianni inissaaleqisoqangaarmat meeqqat inersimasullu napparsimasut Meeqqat uninngasarfianniinnaangitsoq aamma medicinsk afdelingimi uninngarrapput. Meeqqanut arfineq pingasunut uninngasunut inissaqarpoq, Meeqqalli Sullissiviata MIO-p uninngasarfik pulaarmagu 14-it uninngapput. Meeqqalli uninngasut amerlassusaat nikerarput.

Atugassarititaasut pitsaanerusinnaapput
- Meeqqat, ilaat ajorunnaarsinneqarsinnaanngitsunik nappaatillit, inersimasunik napparsimasunik ilaanni anniangaaramik nipituumik kappialasartunik ajornerpaaffianilu toqusartunik ineqateqartinneqartarnerat, meeqqat unitsinneqarneranni toqqissisimanermik qulakkeerinninnerunngilaq, Meeqqat Illersuisuat Aaja Chemnitz Larsen oqarpoq nangillunilu:

- Meeqqat uninngasarfiani pissutsit atuuttut tulluutinngillat. Soorlu inimi ataatsimi sisamaattarissami meeqqap nappaataa pillugu allanik tusaaneqarani angajoqqaanik oqaloqatigiittoqarsinnaanngilaq, oqaloqatigiittarfissamik ineeraqanngimmat.
Meeqqat amerlasuut unittartut illoqarfinnit allaneersut angajoqqaatik ilagalugit unittarput. Sivisuumik unittoqartillugu ilinniartitsisoqartariaqarpoq atuarnerminnik atuaqatiminnillu kinguaattuunnginnissaat siunertaralugu.

Immikkut iliuuseqartoqartariaqarpoq
Meeqqat illoqarfimmit allamit tikittut angajoqqaatik ilagalugit napparsimavimmi uninngasarput.

- Meeqqat pisinnaatitaaffeqarput aammalu atuartussaatitaallutik, taamaattumik atuartinneqartannginnerat FN-ip Meeqqat pillugit isumaqatigiissusiaanik unioqqutitsinertut ippoq, Meeqqat Illersuisuat oqarpoq. Meeqqat uninngasarfissaannik immikkoortumik nutaamik pisariaqartitsinerup, uninnerminnut atatillugu piumasaqaataannik tamanik naammassinnissinnaasumik, misissuisoqarnissaanik innersuussivoq, Meeqqat Illersuisuat oqarpoq.

Meeqqat nappaataat pillugit 2008-mi nalunaajaateqarnermi nassuiaatigineqarput ineriartuinissamik, sulisunik amerlisaanissamik Meeqqallu uninngasarfiata allineqarnissaanik taamanili pisariaqartitsisoqartoq. Taamanili arlaanik susoqaqqissimanngilaq. Nalunaajaaat 2008-mi Inatsisartunut saqqummiunneqarsimavoq.