Wednesday, April 19, 2017 - 15:25

Meeqqat illersuisuat: Politikerit neriorsuutitik maanna eqquutsissavaat

Aviâja Egede Lynge, meeqqat illersuisuat, kommunimi politikerinut qinigaaqqammertunut eqqaasitsissummik oqariartuuteqarpoq.
Assi.: Arkivfoto: Leiff Josefsen
Aviâja Egede Lynge, meeqqat illersuisuat, kommunimi politikerinut qinigaaqqammertunut eqqaasitsissummik oqariartuuteqarpoq. Akisussaaffitsik aamma iliuusissatut pilersaarusiornissaannut eqqaasippai.

Aviâja Egede Lynge, meeqqat pisinnaatitaaffii pillugit sullissivimmi meeqqat illersuisuat, kommunimi politikerinut qinigaarlaanut eqqaasitsissummik oqariartuuteqarpoq.

Atuaruk: MIO Qeqqata Kommunianut tikeraassaaq

- Nunatsinni angalanikooqaanga, takusinnaallugulu kommunini arlallit Naalagaaffiit Peqatigiit Meeqqat pillugit Isumaqatigiissutaat piviusunngortikkuminaatsikkaat. Pingaartuuvoq kommunini politikerit nutaat akisussaaffimmik tamatumannga eqqaamanninnissaat, pimoorussinissaat aamma Nunatsinni meeqqanut inuusuttunullu atugassarititanik pitsaanerpaanik pilersitsiniarnissaat, Aviâja Egede Lynge oqarpoq.

Iliuusissatut pilersaarusiortoqartariaqarpoq
Aviâja Egede Lyngep politikerinit qinigaarlaanit suleriaasissanik ujartuivoq, taamaalilluni iliuuseqartoqarnissaanut qulakkeerinnittoqarniassammat. Meeqqanut inuusuttullu immikkut pisariaqartitsisunut tunngasut tassani ingammik pineqarput.

Kommunalbestyrelsinut ilaasortat sinaakkutinik pitsaasunik pilersitsinissamik inatsisitigut pisussaaffeqartut maluginiaqquaa, taamaanngippallu iliuuseqaqqullugit.

Atuaruk: MIO meeqqanut atuakkamik saqqummersitsivoq

”Inatsimmi § 2-mi atuarsinnaavarput kommunalbestyrelsi pisussaasoq meeqqat ineriartornerannik, ingerlalluarnerannik nammineersinnaanerannillu siuarsaasumik alliartorneranni atugassaqartitsinissamut. Aammattaaq kommunini politikerit pisussaaffigaat meeqqat inuusuttullu inuunerminni atugarisaannik nakkutilliinissaq (§ 4). Kommunini politikerit meeqqamik immikkut ikiorsertarialimmik paasisaqarunik iliuuseqartussaapput (§6)”, Aviâja Egede Lynge oqarpoq.

Inatsisartut upernaakkut ataatsimiinnerat aallartippat, meeqqat pisinnaatitaaffiinik nukittorsaanissamut tunngasumik inatsisissatut siunnersuut oqaluuserineqassaaq.

Seneste nyheder / Nutaarsiassat kingulliit