Friday, January 12, 2018 - 10:11

Meeqqat illersuisuat Namminersorlutik Oqartussanut isumaqatigiissutini sivitsorpaa

Aviâja Egede Lynge meeqqat illersuisuattut ukiuni arfinilinni ingerlaqqissaaq
Assi.: Leiff Josefsen
Aviâja Egede Lynge 2021-p tungaanut Meeqqat illersuisuattut ingerlaqqinnissaa Naalakkersuisut aalajangerpaat

Aviâja Egede Lyngep killilimmik atorfeqartitaanera pisortatigoortumik 1. juni 2018-imi qaangiutissaaq, isumaqatigiissulli massakkut ukiuni pingasuni sivitsorneqarpoq.

Inunnik Isumaginninnermut, Ilaqutariinnermut, naligiissitaanermut Inatsiseqarnermullu Naalakkersuisoq Sara Olsvig ima oqaaseqarpoq:

- Aviâja Egede Lyngep atorfinitseqqinneratigut meeqqat illersuisuattut atorfiup ingerlannerqarnerata allannguuteqanngitsumik ingerlaannarnissaa qulakkeerneqarmat nuannaarutigaara. Meeqqat pisinnaatitaaffiisa sullinneqarnerat ukiuni kingullerni annertuumik angusaqarfiusimavoq meeqqat illersuisoqarfiata ineriartorteqqinneqarnissaata suliallu pingaaruteqaqisup ingerlaqqinnissaa malinnaavigissallugu qilanaaraara.

Meeqqat illersuisat Aviâja Egede Lynge tusagassiuutinut nalunaarut naapertorlugu toqqagaaqqinninni tulluusimaarutigaa:

- Meeqqat sinnerlugit oqaaseqartartuuneq pingaaruteqaqimmat ataqqinaatitut tiguara. Suliakka MIO’llu suliai tatigineqarmata assut qujamasunnaqaaq, Meeqqallu Illersuisuattut piffissami siullermi sulisimaninni ilisimalersimasama misilittagarilersimasamalu atorluarnissaannut qilanaarpunga.

Inatsisartut Inatsisaat malillugu Meeqqat Illersuisuattut killilimmik atorfeqarneq sivisunerpaamik ukiunik arfilinnik sivisussuseqarsinnaavoq. Taamaattumik Aviâja Egede Lynge maannakkut ukiuni kingullerni pingasuni Meeqqat Illersuisuattut sulisussanngorpoq, Naalakkersuisut paasissutissiipput.

Seneste nyheder / Nutaarsiassat kingulliit