Meeqqat Illersuisuat: Meeqqat tamarmik pingaaruteqarput

Meeqqat Illersuisuat Aviâja Egede Lynge meeqqanut inersimasunulli pingaarutilimmik nalunaaruteqarfigai:

"Meeqqat tamarmik pingaaruteqarput – qanorluunniit ikkaluarunik."

Assigiinngissuseq apeqqutaanngitsoq

- Meeqqat assigiinngitsorpassuit naapittarpakka, angisuut mikisullu; meeqqat assigiinngitsunik piginnaanillit assigiinngitsunillu ukiullit. Meeqqat assigiinngikkaluarunilluunniit piginnaasaallu assigiinngikkaluarunik, tamarmik pingaaruteqarput – qanorluunniit ikkaluarunik, taanna tusagassiuutinut nalunaarummi taama oqarpoq.

Taassuma inersimasut kajumissaarpai, meeqqat assigiimmik pineqarnissaannik kiisalu pisinnaatitaaffiinik oqaloqatigeqqullugit.

- Meeqqat pisinnaatitaaffii isumaqanngillat, meeqqat naalagaasut, isumarpulli inersimasut meeqqat aperisassagaat qanoq isumaqarnersut, soorlu aamma meeqqat killilerneqartarnissaat inersimasut pisussaaffigigaat, Aviâja Egede Lynge taama oqarpoq.

Meeqqanut atuagaq nutaaq saqqummertoq

Meeqqat Illersuisuata, meeqqat ulluannut atatillugu, meeqqanut atuagaq nittarsaappaa, meeqqat tunngaviusumik pisinnaatitaaffiinut asanninnermut, illersorneqarnissamut, immikkoortitaannginnissamut kiisalu akuutinneqarnissamut tunngasoq.

Atuagaq ateqarpoq ”Illerpiaasinnaavutit – taama pisinnaatitaaffeqarputit” nunamilu atuarfinnut meeqqerivinnullu tamanut nassiunneqarnikuuvoq.

Klovnit børnebanditterikkullu

Nuummi kulturikkut illorsuarmi Katuami ulloq ullaarnganiik aliikkusersuinertaqarpoq, ilaatigut "Børnebanditterne" aliikkusersuisimallutik. Qatserisartut, Børnebanditterne, klovnit kiisalu naggasiilluni arpaqatigiinneq nalliuttorsiornermi ilaapput.