Meeqqat pisinnaatitaaffii
Meeqqat illersuisuat: Meeqqat pisinnaatitaaffii atuarfimmi ilanngunneqarlik
Meeqqat pisinnaatitaafii pillugit meeqqat atuarfiini ilinniartitsisoqartalertariaqartoq MIO isumaqarpoq
Meeqqat Pisinnaatitaaffiinik Sullissivik MIO ukiup atuarfiusup aallartinneranut atatillugu meeqqat pisinnaatitaaffii pillugit ilinniartitsissutit nutaat saqqummersippai.
Ilinniartitsissutit Danskit Ingerlatsiviat Inuit Pisinnaatitaaffiinut peqatigalugu saqqummiunneqarput.
Atuarfiit tamarmik ulluni makkunani ilinniartitsissut 'Meeqqat Pisinnaatitaaffii Ilinniartitsissutigisigit' pingasunngorlugit nassiussarsiarissavaat. Nukarlernut akullernullu ilinniartitsisutit atorlugit ilinniartitsisut meeqqanik meeqqat pisinnaatitaaffii pillugit ilisimasanik atortunillu aalajangersimasunik ilinniartitsissutissaqalissapput.
Ilinniartitsisutit sungiusaatinik uku pillugit qulequtaqartunik imaqarput: Ilisarititsineq, assigiinngissinneqannginnissamut naligiissitaanissamullu pisinnaatitaaffik, illersugaanissamut ineriartornissamullu pisinnaatitaaffik kiisalu aalajangeeqataanissamut peqataanissamullu pisinnaatitaaneq
Kaassassuk
- Ilinniartitsisut angajoqqaat peqatigalugit tassaapput meeqqat inuusuttuaqqallu pisinnaatitaaffitik pillugit qanoq ilisimasaqartiginissaat pillugu pingaaruteqarnerpaasut. Ilinniartitsisut meeqqat pisinnaatitaaffii pilluigt ilinniartitsinissap sapinngisaq tamakkerlugu oqitsuunissaa ilinniartitsissutit siunertaraat, meeqqat illersuisuat Aaja Chemnitz Larsen oqarpoq nangillunilu:
- Taamaattumik ilinniartitsissutit ilinniartitsisunut paasissutissanik kiisalu isiginnaartitsissutigineqarsinnaasunik siunnersuutinik, pisinnaatitaaffiit pillugit akunnattoorutinik sungiusaatinillu meeqqanut pisinnaatitaaffiit pillugit nuannersumik ilinniutaasinnaasunik imaqarput, Aaja Chemnitz Larsen oqarpoq.
Ilinniartitsissut ilinniartitsisunit ilinniartitsisunngornianillu misilittarneqarpoq.