Naturkatastrofe
Meeqqat Illersuisuat: Meeqqat inuusuttullu eqqugaasut eqqarsaatikkut najorpakka
Meeqqat Illersuisuat Aviaaja Egede Lynge, Avannaani illoqarfinni nunaqarfinnilu arlalinni 2015-mi tikeraartoq, pisimasunit assut sunnerteqqavoq, annermillu Nuugaatsiami, Illorsuarni Uummannamilu meeqqat eqqarsaatigalugit.
- Tassaarsuaq taassumalu aseruatiterinerit nassatai tusarlugit annilaarnaqaaq. Inuit ilaasa ilaquttatik suli naninngilaat, allat angerlarsimaffitik annaavaat tamarmillu nunaqarfimminni avatangiisit toqqissinartut qimattariaqarpaat. Pisoq alianaqaaq, neriuppungalu kikkut tamarmik isumagilluarneqarumaartut, annermik meeqqat inuusuttullu eqqugaasut
Arfininngormat malissuaqarsimanera pillugut meeqqat illersuisuat Aviâja Egede Lynge taama oqarpoq.
Meeqqat Illersuisuata Avannaani ilaqutariinnik tapersersuinini nalunaarutigaa. Nalorninartorsiungaarfimmi pingaartuuvoq inersimasut eqqugaasut tamarmik oqaloqatigiinnissaat imminnullu ikorfartoqatigiinnissaat, taanna oqarpoq.
- Uummannami eqqaanilu meeqqat inuusuttullu eqqugaasut inersimasumik tapersersorneqarnissartik aperisaqarsinnaanertillu pisariaqartissavaat. Pingaartuuvoq meeqqat inuusuttullu eqqugaasut pisariaqartitsigunik inersimasumik eqqarsaatiminnik anitsivigisinnaasaminnik aperisinnaasaminnillu saaffissaqartutut misiginissaat. Qanoq iliornissaq qanorluunniit oqaaseqarnissaq nalornigaanni isumassarsiatsialaasinnaavoq ilaquttat ikinngutillu, kiisalu sulisut qanitarisat oqaloqatiginissaat, taanna erseqqissaavoq.
Meeqqat Illersuisuata ilaqutariit eqqugaasut misiginneqatigingaarpai, aamma meeqqat inuusuttullu, pisumik sakkortoqisumik eqqugaasut asannittumik inuulluaqqujumallugit.
- Asasakka Avannaani meeqqat inuusuttullu. Nalunngilara Nunatsinni inuppassuit sapinngisartik tamaat pisariaqartitassinnik ikiorniarlusi iliuuseqartut. Atisanik, nerisassanik aningaasanillu katersiniartoqarpoq, ilaquttasi pisariaqartitassinnik ikiorneqaqqullugit, ulluinnarisarsi ingerlateqqissinnaalerniassagassiuk. Naak immaqa maannakkorpiaq taamatut misiginanngikkaluartoq, ulluinnaq toqqissimanartoq uteqqikkumaarpoq. Asannittumik eqqarsaatigalusi ajunnginnerpaanik kissaappassi, meeqqat illersuisuat Aviâja Egede Lynge taama oqarpoq.