Børnetalsmand

Meeqqat illersuisuat: Meeqqat ikiaroortartut pillugit isumakuluppoq

Meeqqat illersuisuat Aviâja Egede Lynge, KNR-imi nutaarsiassani Qaqortumi meeqqat ikiaroortartut pillugit pissutsit oqaluttuarineqartut assorsuaq isumakuluutigai

Aviâja Egede Lynge
Meeqqat illersuisuat Aviâja Egede Lynge

Meeqqat Inuusuttullu Oqaloqatiginnittarfiani meeqqat illersuisuat Aviâja Egede Lynge, meeqqat qulit aqqaneq-marlullu akornanni ukiullit Qaqortumi ikiarorrtut KNR-imi nutaarsiassani julip sisamaani 2015 saqqummertumi tusareerlugit isumakuluuteqarnini oqaatigaa.

- Meeqqat 10-niik 12-inut ukiullit ikiaroornartup pallinnissaanut periarfissaqartariaqanngillat. Meeqqat peqqissumik inuuneqarnissartik ikiaroornartumullu illersorneqarnissartik pisinnaatitaaffigaat. Tamanna angajoqqaat akisussaaffigaat, Aviâja Egede Lynge tusagassiuutinut nalunaarummini oqarpoq.

Meeqqat illersuisuata aamma erseqqississarpaa ikiaroortarnerup meeqqanut kingunipiloqarujussuarsinnaanera:

- Ullumikkut ilisimavarput, ikiaroornartumik ukiukitsilluni pujortartaraanni, tamatuma meeqqap ineriartorneranut ajoqutissarsissutaasinnaanera suli annertunerusartoq.

Inersimasut tamarmik akisussaaffiat
Naalagaaffiit Peqatigiit meeqqat pillugit isumaqatigiissutaat nunatta 1993-imi ilannguffigisaa naapertorlugu, nunat isumaqatigiissummut ilaasut tamarmik meeqqat anngiortumik ikiaroornartumik atuinermut ikiaroorniutinillu allanut illersorneqarnissaat naapertuuttunik malittarisassiuuttussaavaat. Tassa malittarisassanik atuutsitsinermi tamanna ima isumaqarpoq, pisortat aamma nunap politikeriisa aaqqiissutissat meeqqat Qaqortormiut pineqartut inissisimanerattut ittut aaqqiissutissarsiussagaat, MIO ilisimatitsivoq.

- Inersimasut tamatta, angajoqqaajugutta politikeriuguttaluunniit ikiaroornartumik atuinerup kingunipilorisinnaasaanut iliuuseqarnissamut isummersortariaqarpugut. Meeqqat ikiaroornartuuteqarnerat akuerineqarsinnaanngilaq. Tamatumunnga ersarissumik isiginneriaaseqarnissarput pisariaqartipparput, meeqqat illersuisuat oqarpoq.

- Aviâja Egede Lyngep kissaatigaa ikiaroornartup inuiaqatigiinnut kingunerisai sammineqassasut, ingammik Nunatsinni ikiaroornartup meeqqanut inuusuttunullu sunniutigisartagai, tamanna tusagassiuutini nalunaarummi erseqqissarneqarpoq.

Powered by Labrador CMS