qinersineq

Meeqqat illersuisuat Inatsisartunut qinigassanngortippoq

Meeqqat illersuisuat, Aaja Chemnitz Larsen, Inatsisartunut Inuit Ataqatigiit sinnerlugit qinigassanngortippoq atorfimminiillu sulinngiffeqarallalerluni

Meeqqat illersuisuat, Aaja Chemnitz Larsen, Inatsisartunut qinigassanngortinniarluni aalajangersimavoq

Aaja Chemnitz Larsen Inatsisartunut novembarip 28-ani qinersinissamut sassarpoq Inuit Ataqatigiit sinnerlugit.

Taama nammineq nalunaaruteqarpoq.

Aaja Chemnitz Larsen oqaluttuarpoq qinigassanngortinniarluni qanittumi aalajangersimalluni, aamma qineqqusaarnerata nalaani paatsoortoqannginnissaa siunertaralugu atorfimminit qineqqusaarnerup nalaani sulinngeqarniarpoq. Tamatuma saniatigut Transparency International Greenlandimit ukiuni kingullerni marlunni siulittaasup tulliatut inissisimaffigisimasaminit tunuarpoq.

Aaja Chemnitz Larsen meeqqat illersuisuattut atorfimminit oktobarip 30-niit feerialissaaq sulinngiffeqaatigaluni qinersinissap tungaanut. Tamatuma kingorna qanoq ingerlariaqqissanerluni aalajangissavaa.

Atuaruk: Ruth Heilmannip meeqqat akerlioqataatinneqarnerat tupaallaatigigaa

Meeqqat Siunnersuisoqatigiivi tuaviortumik aggersarneqartut
Aaja Chemnitz Larsenip, aamma Meeqqat Siunnersuisoqatigiviini siulittaasuusup, siunnersuisooqatigiit aqagu pingasunngornermut ataatsimiigiarnissaannut aggersarasuarsimavai. Ataatsimiinnermi tassani siunnersuisooqatigiit allattoqarfik peqatigalugu Aaja Chemnitz Larsenip qineqqusaarnermi nalaani suliffinngeqarnerani suliassat qanoq agguataarneqarnissaat pilersaarusiussavaat.

- Allattoqarfimmi suliassat piffissap pineqartup iluani sulisunit agguataarneqarlutik ingerlanneqarumaarput,aammattaaq piffissap iluani Meeqqat Siunnersuisoqatigiivinit illersuisugallartussamik toqqaasoqassaaq. Kingusinnerusukkut qanoq pisoqarumaarnera isummerfigineqarumaarpoq, Aaja Chemnitz Larsen ilisimatitsivoq.

Qineqqusaarutiginiagai
Aaja Chemnitz Larsen oqaluttuarpoq qinigassanngortinniarluni aalajangerniarnini sapernarsimasoq Meeqqat illersuisuattut atorfini kiisalu Meeqqat Siunnersuisoqatigiivini kiisalu Inuit Pisinnaatitaaffiinut

Kalaallit Nunaata Siunnersuisoqatigiivini siulittaasutut sulinini nuannarisimagamiuk.

- Paasisimavarali uanga politikerisut suliniuteqarnikkut meeqqat inuusuttullu annerusumik sullissinnaassallugit. Misilittakkakka tunngavigalugit ullumikkut meeqqat atugaasa pitsanngorsaaviginissaat politikkikkut naammattumik ukkanneqarnerat takusinnaanngilara. Suliffigisartakkanni tamani meeqqat inuusuttullu, aammalu allat sanngiissuseqartut atugarisamikkut inuiaqatigiinni pitsanngorsaaffigineqarnissaat sulissutigiuartarsimavara. Aalajangersimavunga – ilaquttakka isumasioqatigereerlugit – uanga politikerisut suliaqarnikkut pissutsit annerusumik sunniivigisinnaassallugit, tassalu qinigassanngortippunga, Aaja Chemnitz Larsen oqarpoq.

Aaja Chemnitz Larsenip meeqqat pisinnaatitaaffiisa atuutsinneri, ilaatigut siusissukkut inunnik isumaginnittoqarfimmit iliuuseqartalernissaq, meeqqat atuarfiat nukittorsigaq aammalu inuusuttut amerlanerusut ilinniagaqartalernissaat immikkut ittumik ilungersuullugit sulissutigerusuppai.

Atuaruk: Ruth Heilmannip meeqqat akerlioqataatinneqarnerat tupaallaatigigaa

Powered by Labrador CMS