Ny rapport om hjemløse
Meeqqat illersuisuat: Atuakkat tataarnartut
Nalunaarusiap nutaap ersersippaa Kalaallit Nunaanni angerlarsimaffeqanngitsutut inuunerup qanoq ittuunera, tamanna meeqqat illersuisuata Aaja Chemnitz Larsen qisuariarneranik nassataqarpoq
Nalunaarusiap Namminersorlutik Oqartussanit piniarneqarsimasup angerlarsimaffeqannginneq pillugu ajornartorsiutit ersersippai.
Nalunaarusiami takuneqarsinnaanngilaq ilaqutariit meerartallit qassit angerlarsimaffeqannginnermik eqqugaasimanersut illuatungaani ilaqutariinnut angerlarsimaffeqanngitsunut inuunerup qanoq ittuunera assigiinngitsumik ersersillugu.
Atuarlugu tataannarpoq, meeqqat illersuisuat Aaja Chemnitz Larsen oqarpoq.
Nalunaarusiami allaaserineqarput inissiat, amerlasuutigut pitsaajunnaarsimasut ilaqutariinnit 7 – 9 tikillugit inuttallit inimi ataatsimi inissinneqarsimasartut. Amerlasuutigullu inisseqarallarsimasut najugaqatigisarlugit, taakkualu inuuneri imigassamit fiisternernillu atuiffiusut ilagisarlugit. Pissutsit taamaattut meeqqamut toqqissisimanartuunngillat, nassatarisaanillu meeqqat atuarnerminnik paarsiniarnerat ajornakusuulersinnaasarpoq, Aaja Chemnitz Larsen erseqqissaavoq.
Nalunaarusiami aamma oqaatigineqarpoq meeqqat inooqatigiinnikkut ajornartorsiortartut, amerlasuullu qinngasaarneqarneq meeqqallu allat ataatsimoorfiinit avataaniitsinneqarneq misigisaraat.
Akuerineqarsinnaanngilluinnartut.
Misissuinerup inernerisa ersersippaat, ilaquariit taama inigisaqaratik inissisimalinnginnissaat eqqanaarniarlugu nutaamik eqqarsalernissatsinnik pisariaqartitsisoqartoq. Tassaasinnaavoq inissaqarniarnermi inooqatigiinnikkut suliniutit, soorlu kommunit aamma inissiaatileqatigiiffiit suleqatigiinnerisigut. Taamalillutik ajornartorsiutit suli ajornerulinnginnerini suliarineqarsinnaaniassammata, ilaqutariillu meerartallit taama atugassaqartinneqarlutik inissisimalinnginniassammata kommunimi suleriaasissanik eqqanaarinnittoqartariaqarpoq, meeqqat illersuisuat oqarpoq.
- Uanga aamma isumaqarpunga, meeqqap angajoqqaaminut attaveqarnissaa qitiutissallugu pingaartuusoq. Taamaattumik inissiamik nassaartoqarsinnaanngikkaangat meeqqanik allanut inissiisarneq kommunit ilaanni pisartoq akuerineqarsinnaanngilluinnartutut isigaara.Meeqqap angajoqqaani angerlarsimaffissanganngitsoq najunngikkaangagu aamma toqqissillutik naapeqatigiiffigisinnaasartagassaannik aalajangersimasunik peqarnissaa pisariaqartinneqarsinnaavoq, taamaalilluni meeqqap aamma angajoqqaajusup imminnut attuumassuteqarnerat attatiinnarneqassammat, Aaja Chemnitz Larsen oqarpoq.