kommuni nersualaarpaa
Meeqqat illersuisuat: Akeqanngitsumik nalunneq peqqissutsimut ineriartornermullu iluaqutaassaaq
Meeqqat illersuisuata Aviâja Egede Lyngep nuannaarutigaa illoqarfiit pingaarnersaata meeqqat inuusuttullu akeqanngitsumik naluttarfimmik atuisittalerniarmagit
Peqatigiiffiup MIO-p, nuna tamakkerlugu meeqqat atugarisaasa pitsaanerulersinnissaanik sulissuteqartup, nuannareqalugu Sermitsiaq.AG-mi atuarpaa meeqqat inuusuttullu 2016-imi akeqanngitsumik naluttarfimmukarsinnaalissasut.
Meeqqat illersuisuata Aviâja Egede Lyngep tamanna isigaa Kommuneqarfik Sermersuup meeqqat pisinnaatitaaffiinik, kommunip 2014-imi MIO peqatigalugu sammilikkaminik, sulinerminik ineriartortitseqqinneratut.
Suli amerlanerusut
– Kommuneqarfik Sermersooq taamatut pitsaasumik aalajangiineranut nersualaarusuppara, tamatumuuna meeqqat ineriartornerat peqqissusaallu siuarsarneqassammata, taanna oqarpoq.
Kommune suliniutinik arlalinnik, akeqanngitsumik nalunnermut assingusunik, pilersaaruteqartoq oqaatigineqarpoq. Tamannalu MIO-p nuannaarutigaa, meeqqat pisinnaatitaaffii pillugit FN-ip isumaqatigiissutaanut assingussuteqarnera takusinnaagamiuk.
MIO Sermersuumi meeqqat inuusuttullu peqatigalugit meeqqat akeqanngitsumik sammisaqartinnissaannut kommunalbestyrelsimut inassuteqaasiorsimavoq, meeqqat amerlanerusut assigiissunik periarfissaqartikkumallugit.
FN-ip meeqqat pisinnaatitaaffii pillugit isumaqatigiissutaani artikel 31-mi allassimavoq ´meeqqat inuusuttullu pinnguarnissamut soqutigisanillu aallussinissamut pisinnaatitaaffeqarput, nunallu ilaasortat kulturikkut, eqqumiitsuliornikkut, sunngiffimmi sammisaqartitsinikkut peqqissarlunilu sammisassatigut naleqquttunik atugassaqartitsillutillu assigiissunik periarfissiissapput´.