futsal
Meeqqat futsalimik pissartanngorniunnerat: Peqatigiiffiit tamarmik ajugaapput
Meeqqat inuussuaqqallu futsalimik Polar Seafood Cup-ernerat Nuummi Illorsuaq Timersortarfimmi atuarfiullu eqaarsaartarfiini ingerlanneqarpoq
Sapaatip akunnerata naanerani Polar Seafood Cup 2018 futsalimik pissartanngorniuunneq Nuummi ingerlanneqarmat peqataasut tamarmik, B-67, GSS aamma N-48 ajugaapput. B-67-imi siulersuisuninngaanneersoq Finn Meinel taama paasissutissiivoq.
Aamma atuaruk: Elitefutsalimik pikkorissaaneq iluatsilluartoq
Atuarfiit eqaarsaartarfianni ilaat ingerlanneqartut
Timersortarfiup piffissami killilimmik atorneqarnera pissutigalugu U-11atuarfiit eqaarsaartarfianni unammisinneqarput.
U-11-ni holdit tallimat peqataapput, B-67-miik pingasut GSS-miillu marluk. B-67 kuultinnallunilu bronzennappoq GSS-ilu sølvinnalluni. B-67 U-9-it angajulliit unammersuarneranni peqataasut angusarissaarlutik sisamaattut inissipput.
Aamma atuaruk: Rene Olsen futsalimik nunanut allanut unammisartunut sungiusaasunngoqqippoq
Tupaallannartumik ajugaaneq
U-13-ini GSS pissartanngorniutivinnermi ilimagineqarluartut N-48 arsarnerlunneranni ajugaaffigaat. N-48 unammersuarnerup aallartinnerani B-67-imut ajorsarsimangaluarluni pissartanngorniutivinnissamut anngussimavoq.
GSS B-67 semifinalimi unammereerlugu pissartanngorniutivinnissamut annguppoq, B-67 unamminerup naammassinissaa tikillugu amerlanerpaanik isertitseriarsimangaluarpoq. GSS arsaq qutsissukkoortillugu saassussillatuarnerani, illersuisoq måålinillu illersuisoq akornisigut arsaq B-67-ip måålinut iserpoq. Taamaasilluni semifinalimi isertinneqartutuaq GSS-ip isertippaa. U-13-it pissartanngorniutivinnerini GSS unammilluarlutik 3-0-mik ajugaapput.
- Pingaartumik Regin Thomsen GSS-iminngaanneersoq unammilluarpoq. Regin Thomsen, Julius Ringsted aamma Asii Berthelsen (GSS) Johan Berglund (N-48) aamma Romeo Blidorf (B-67) ukiup holdiinut ilanngupput, Finn Meinel allappoq.
N-48 naatsorsuutigisamik ajugaasoq
Nukappissat angajulliit pissartanngorniutivinnerat pisariaqanngitsumik aqqunarfiusoq sakkortuumik sivisuumillu ingerlanneqarpoq. Pissartanngorniutivinnermi ilimagineqareersutut N-48 B-67-imut ajugaavoq.
- Brian Bernhardtsen aamma Niklas Thustrup Johnsen N-48-imi saassussisartoralugit unammersuarneq tamakkerlugu arsarluaqattaarput.
GSS bronzennapput. N-48-minngaannersuinnangajaat ukiup holdiat ilanngupput, tassaasut Aputsiaq Jakobsen, Brian Bernhardtsen, Lamek Møller aamma Niklas Johansen. Rene Thomsen, B-67-minngaanneersoq ukiup holdianut aamma ilannguppoq.
B-67 niviarsiarartaat ajorsartinneqanngitsut
U-17 niviarsiaqqat unammersuarnerini B-67 ajorsartinneqaratik pissartanngorput. B-67 unammersuarneq tamaat akersuulluarlutillu unammilluaqattaarput. IT-79 sølvinnapput. Juliet Egede, B-67, ukiumi akersuutillammanngorpoq. Stine Kongspak Pedersen, B-67, ukiumi arsallammanngorpoq.