Meeqqat atugarliornerannut Danmark ikiuunnissaminut piareersimasoq

Septemberip qaammataani meeqqat illersuisuata Aviâja Egede Lyngep Qaasuitsup Kommuniani meeqqat atugaat pillugit isornartorsiuivoq.

Taamatut isornartorsiuneq kuseriarnerup siaruuaanneratut ingerlaarluni Danmark tikippaa, taamatullu annertuumik maluginiarneqarluni.

Ima maluginiarneqartigaaq, Folketingip Kalaallit Nunaat pillugu ataatsimiititaliaata ilaqutariinnermut, naligiissitaanermut isumaginninnermullu naalakkersuisoq, Martha Lund Olsen (S), pingasunngornermi pisoq pillugu ataatsimeeqatigiumallugu aggersarpaa.

FN-ip peqqussutaa malissagaa
Københavnimi isumaginninnermut ministerip, Karen Ellemannip (V), imaluunniit De Radikaleni nunarput pillugu oqaaseqartartumit Naalakkersuisut oqaloqatigalugit ikiuunnissamik itigartitsinngillat.

- Suliaq taanna aaqqiivigineqarnissaanut danskit tungaaningaanniit sukkut ikiuinissamik pisariaqartitsisoqarnersoq Kalalalit Nunaat oqallisseqatiginissaanut piumavunga, Karen Ellemann DR-mut oparpoq.

- Tassami naalagaaffeqatigiikkatta, Nalagaaffiit Peqatigiit Meeqqanut Peqqussutaannut iserutta, danskit tungaaninngaanniit Kalaallit Nunaat sinnerlugu aamma iserneruvoq.

Folketingimi amerlanerussuteqalersitsiniartut
Radikale Venstremeersoq Martin Lidegaard pisinniaasani tamaat, Danmarkimi naalakkersuisut tassuunakkut tapersiinerunissaannut sulissutiginiarlugu, DR-mut oqarpoq.

- Imatut oqaatigerusuppara, qallunaat naalakkerusuisuisa ilimagisatut Kalaallit Nunaannut ikiuimassanngikkaluarpata, taava neriuutigaara Folketingimi amerlanerussuteqartut allanngortinniarumaaraat.

Maani Nunatsinni Partii Naleqqap siulittaasua Hans Enoksen pineqartumut akuliuppoq, naalagaaffik aamma Naalakkersuisut isornartorsiorlugit.

Suliat toqqortorneqartut
- Pinerlutsaalisitsinermut tunngasut isumannaatsumik ingerlanneqarnissaat qallunaat naalagaaffiata pisussaaffigaat. Meeqqat kinguaassiutimikkut atornerlunneqarsimasut suliniarfigineqarneranni politiit annertuumik akuliuttariaqarlerput, ilisimatinneqaratta meeqqanik kinguaassiutitigut atornerluinerit ukiut arlallit soqutigineqanngitsutut illutik suliarineqarsimanngimmata.

- Naalagaaffillu amerlanerusunik politeeqarnermut eqqartuussiveqarnermullu aningaasaliissuteqartariaqarpoq. Namminneq pisussaaffitsik puigorlugu uagutsinnuinnaq tutsitsiniaanerat akuersaarsinnaanngilarput, naalakkersuisuni siulittaasuusimasoq taama oqarpoq, Naalakkersuisullu isornartorsiorlugit.

Nalunaarusialiunngitsoq
- Naalakkersuisut eqeertariaqalerput, pissutsit meeqqanut Qaasuitsup Kommuniani atuutsinneqartut illersorneqarsinnaanngitsut meeqqat illersuisuannik oqariartuutigineqartut soqutiginngitsutut illugit, soorluli meeqqat atugaasa taamaaginnarnissaat akuersaaraat, Hans Enoksen aperivoq.

Suliami matumani ilaatigut Danmarks Radiomit oqaatigineqarpoq, meeqqat illersuisuat Aviâja Egede Lynge, Qaasuitsup Kommunia pillugu nalunaarusiorsimasoq, tamannali eqqunngilaq.

Meeqqat illersuisuata nammineq takusani aamma saaffiginnissutini aallaavigalugit isornartorsiuivoq.

Meeqqat illersuisuata isornartorsiuneranut tunngasut Sermitsiaq.AG-mi uani malinnaavigikkit