meeqqat inuusuttullu
Meeqqat atugaat Kim Kielsenip aamma meeqqat illersuisuata eqqartorpaat
Naalakkersuisut siulittaasuat Kim Kielsen aamma meeqqat illersuisuat Aviâja Egede Lynge isumaqatigiipput inuiaqatigiit tamarmiullutik akisussaaffimmik tigusisariaqartut meeqqanut innarliisarneq unitsinniarlugu, tamarmillu pisussaasut meeqqat pisariaqartitisut ikiussallugit
Naalaakkersuisut siulittaasuat Kim Kielsen (S) kiisalu Meeqqat Illersuisuat Aviâja Egede Lynge meeqqat ukiuannut atatillugu naapissimapput Kalaallit Nunaanni meeqqat atugaat eqqartorniarlugit.
Taakku isumaqatigiissutigaat, inuiaqatigiit tamarmiullutik akisussaaffimmik tigusisariaqartut meeqqanut innarliisarneq unitsinniarlugu, tamarmillu pisussaasut meeqqat pisariaqartitisut ikiussallugit. Tamarmik akisussaaffeqarput, tassa Namminersorlutik Oqartussat, kommuunit, suliffeqarfiit, angajoqqaat allallu innuttaasut.
Suleqatigiinneq
- Naqissuserluartariaqarparput meeqqatta paaqqutarinissaannut pissusigut allanngortittariaqaratsigit, Kim Kielsen kiisalu Aviâja Egede Lynge oqarput.
Meeqqat illersuisuata siunnersuutaa aallaavigalugu Namminersorlutik Oqartussat MIO suleqatigalugu misissuiniarput meeqqanut ileqqorissaarnissamut oqallittarfimmik pilersitsinissamik.
Meeqqanut ileqqorissaarnermut oqallittarfiup oqallisissat pingaarutillit saqqummiuttassavai, soorlu meeqqat illersornissaannut suut naleqartitat tunuliaqutigineqassanersut.
Atuaruk: Periuseq nutaaq meeqqanut inuusuttunullu iluaqutaasoq
Tassunga atatillugu suleqatigiiliortoqarsimavoq naalakkersuisunut ilaasortat Doris Jakobsen (S), Martha Lund Olsen (S) kiisalu Nivi Olsenip (D) akornanni ilaasortaqartumik. Suleqatigiisitap taassuma qulakkiissavaa immikkoortortaqarfiit akornanni meeqqanut suliniutit ataqatigiissaarnissaat.
- Meeqqanut illersuisutut nuannaarutigaara meeqqat isiginiarneqarmata, kisiannili naqissuserusuppara qanoq iliuuseqarnissaq pisariaqartikkatsigu, tamattalu akisussaaffimmik tigusisariaqaratta, Aviâja Egede Lynge oqarpoq.
Naalakkersuisut siulittaasuat meeqqallu illersuisuat ukiup ingerlanerani akuttunngitsumik naapittassasut meeqqanut tunngasunik ilisimatitseqatigiittassallutik isumaqatigiissutigineqarpoq.