meeqqat illersuisuat
Meeqqat atugaasa sakkortuumik isornartorsiuinerup kingorna kommuni iliuuseqarpoq
Meeqqat illersuisuat Qeqqata Kommuniani isornartorsiuilluni nalunaarusiornerata kingorna ingerlaannaq iliuuseqartoqarpoq.
”Meeqqat oqariartuutaat sakkortupput, tusarnaassavavut, kommunillu meerartai inuusuttailu ikiorneqarnissamik pisariaqartitaannik ikiorneqarnissaat anguniagaqartumik sulissutigissallutigu, borgmester Malik Berthelsen tusagassiuutinut nalunaarummi oqarpoq.
Sullissisut nutaat tallimat
Kommuni suliniuteqareerpoq, sullissisartussanimmi tallimat immikkut atorfinitsitsisoqassaaq, sisamanngorpallu kommunalbestyrelsip ataatsimiinnerani missingersuutitigut kissaat inaarutaasumik akuersissutigineqassaaq.
Borgmester paasissutissiivoq, kommunip illoqarfiini nunaqarfiinilu ikiaroornartumik tuniniaasarneq pillugu politiit ataatsimeeqatigereersimallugit, ikiaroornartumik tuniniaasarnerup eqqussisarnerullu akiornissaanut akitsuuserisumik
atorfinitsitsinissaq pillugu, Namminersorlutik Oqartussanut saaffiginnissummik nassiussisoqarluni.
Akimut suleqatigiinneq
- Suliat akimorlugit suleqatigiinneq nukittorsarniarlugu, Qeqqata Model ineriartortinnissaanut atuutilersinnissaanillu kommuni suliaqarpoq. Suliat akimorlugit suleqatigiinneq nukittooq, siusissukkut iliuuseqarneq kiisalu meeraq qitiutillugu Qeqqata Modelimi aallaaviupput, Malik Berthelsen paasissutissiivoq, MIO'llu kommunimut ikiuukkusunneranik tigulluarlugu.