sipaarniarneq

Meeqqat atuartut sipaarniarfigineqarnerat pillugu isumaat tusaaneqassapput

Kommuneqarfik Sermersuup meeqqat atuarfiinut sipaarniarnerat Meeqqat illersuisuata Aaja Chemnitz Larsenip ernumanartoqartippaa

Meeqqat illersuisuata Aaja Chemnitz Larsenip misissorniarpaa qanoq Kommuneqarfik Sermersuup sipaarniarneranut meeqqat eqqorneqassanersut

Kommuneqarfik Sermersooq 9,5 million koruuninik meeqqat atuartitaanerat sipaarfiginiarpaat. Meeqqat illersuisuata Aaja Chemitz Larsenip sipaarniarnerup meeqqanut eqquinissaa ernumassutigaa. Meeqqat illersuisuat Kommuneqarfik Sermersuumut ataatsimiigiannginnermini sipaarniartoqarnissaa pillugu meeqqanik atuartunik apersuiniarput.

Meeqqanut atuartitsinermut atorneqartartunut aningaasat 10 procentiinik sipaartoqarniarpoq, tamannalu meeqqanut eqquisinnaasoq Aaja Chemnitz Larsenip ernumassutigaa.

- Aalajangernermi suna tunuliaqutigineqarsimanersoq, tunngavigineqarsimanersoq sunalu atuutsitsilernissami pilersaarutaanersoq paasiniarparput. Kommuneqarfik Sermersuumi suleqatigiinnissamik isumaqatigiissuteqartutut kommunalbestyrelsip oqaloqatiginnginnerani aalajangernerup qanoq kinguneqarnera meeqqanik apersuinikkut malinnaaffigissavarput, Aaja Chemnitz Larsen nalunaarpoq.

Namminersorlutik Oqartussat kisitsisaataat malillugit, atuartut meeqqat atuarfianiit ingerlariaqqittartut 57 procentiupput.

Tamatumunnga ilutigitillugu ilinniartitsisut ukiup ingerlanerani maluginiaqqusimavaat, atuartunut inuttut ajornartorsiuteqartunut tunngatillugu unammilligassarpassuaqartoq. Ilinniartitaanermi Periusissami anguniarneqarpoq, meeqqat tamarmik – inuttut qanoq tunuliaquteqarnerat apeqqutaatinnagu – ilinniaqqinnissaminnut piginnaanngorsarneqassasut.

Powered by Labrador CMS