attaveqaatit

Meeqqat atuartut pingajorarterutaat qinngasaarneqartarput

Kalaallit Nunaannit atuartut pingasuugaangata ataatsip qinngasaarneqarneq misigisarpaa, tamanna misissunerup takutippaa. Qinngasaarinerup annerpaartaat nittartakkakkut attaveqaatitigut pisarput

SMS, mobiltelefon
Facebook, Snapchat aamma Instagram meeqqat inuusuttullu tamani mobiiliiniipput

Meerarpassuit inuusuttorpassuillu qinngasaarneqartarput aamma digitalitigut. Tamanna meeqqat atuartut inuunerannik misissuinerup takutippaa.

Annermik Facebook, Snapchap aamma Instagram qinngasaarunnermut atorneqartartut misissuinerup HBSC-mik taaguutillip 2014-imi apersuinernik aallaaveqartup takutippaa.

2.000-it missaat apersorneqartut
Nalunaarusiaq meeqqat atuarfianni Kalaallit Nunaanni atuartut atugaannut aamma peqqissusaannut tunngasoq, ullumi ataasinngornermi Statens Institut for Folkesundhedimit saqqummersinneqarpoq. Kalaallit Nunaanni meeqqat atuartut pingajorarterutaasa digitaliusumik qinngasaarinermik taaneqartartoq ataasiarlutik arlaleriarlutilluunniit, qulerarterutaasalu qaammammut arlaleriarlutik misiginikuugaat tassani atuarneqarsinnaavoq.

HBSC Greenland 1994-imili ukiut sisamakkaarlugit kalaallit meeqqat atuartut peqqissusaat aamma atugaat misissuiffigisarpaat. Apersorneqartut meeqqat aqqanillit aamma 17-it akornanni ukioqartarput. Misissuinermi kingullermi meeqqat 1.900-nit ikinnerunngitsut apersorneqarput.

Misissuinermut nalunaarusiaq qallunaatoortoq tamaat uani atuaruk.

Niviarsiaqqat nukappiaqqanit amerlanerusut qinngasaartinneq misigisaraat misissuinerup takutippaa. Assersuutigalugu niviarsiaqqat 28 procentiisa misigisarpaat, nukappiaqqat 14 procentimmiittoq.

Amerlanertigut allagarsiat assilluunniit nuanninngitsut nassiunneqartarput - Nassiussisorlu pinerit tamatigut takuneqarsinnaasarani.

Nunatsinni qinngasaarisoqarajuppoq
Ilisimatuut naapertorlugit qinngasaarisarneq illoqarfinni nunaqarfinnilu takussaavoq. Misissuinermi aqutsisuusoq, Birgit Niclasen, Statens Institut for Folkesundhedimi ilisimatooq nassuiaavoq.

- Aatsaat siullermeerluta meeqqat digitalitigut qinngasaarisarneq pillugit apersorpagut, tupaallaatigaarpullu taama atuutsiginera. HBSC-imi misissuinerit siuliini nalunngilarput Kalaallit Nunaanni qinngasaarisarneq nunanut allanut sanilliullugu qinngasaarisarneq annertunerutiginera, kisianni naatsorsuutigisimanngilarput digitalitigut qinngasaarineq taama annertutigisoq. Kisianni meeqqat qinngasaariniarunik sakkussatik pigisatik soorunami atortarpaat, taanna oqarpoq.

Atuaruk: Mobilikkut sakkortuumik ajortisaarneqartarsimavoq

Powered by Labrador CMS