meeqqat atuarfiat
Meeqqat atuarfiat naliliiffigineqassaaq
Meeqqat ineriartorluarnissaat anguniarlugu ilaatigut nutaamik atuartitaanermut inatsiseqalerpoq. Qanoq taanna atorluartigineqarnersoq misissuiffigineqarlunilu nalilersorneqassaaq
Kalaallit Nunaanni meeqqanut atuartunut nutaamik inatsiseqalerpoq 2003-mi. Nutarsaasoqareerneratigut atuartut 1. klassimit 10. klassip tungaanut atuartut naammassikaasalereerput.
Taanna tunngatillugu Namminersorlutik Oqartussat Danmarks Evalueringsinstitut (EVA) paasiniaqquaat meeqqat atuarfiat maannakkut qanoq inissisimanersoq.
- Nalilersuinissaq pissanganartuuvoq, EVA-mi special-konsulenti Helene Brochmann oqarpoq. Taanna eskimologimi inuiaqatigiilerinermilu cand.magiuvoq ilinniareernermilu kingorna Akunnaami ilinniartitsisuunikuulluni.
- Inuiaqatigiit ineriartorneranni meeqqat atuarfiat pingaaruteqartutut inissisimavoq, taamaattumik ilinniartitsinerup ingerlalluarnissaa pingaaruteqarpoq. Nalilersuinitsinni paasinarsissaaq inatsip nutaap qanoq sunniuteqarsimanera, Sermitsiaq.AG-imut nassuiaavoq.
Ineriartortitsineq
Inatsip atuutilernerani atuartunut ineriartortitsinissap qanoq sunniuteqarsimanera nalilersorneqassaaq. Qanoq amerlatigisut atorsimaneraat paasiniarneqassaaq sunniutaalu misissorneqarluni.
Ilinniartitsinissamut piareersartarnerit aamma nalilersuinermi misissorneqassapput.
- Meeqqat atuarfiannit soraarummeertut ilinniakkatik aamma ilinniarfinnut ingerlariaqqiffissanut soorlu GUX-imut atorsinnaaneraat aamma misissorneqassaaq. Suut unammillernartuusimanersut ilinniartitsisunut, meeqqanut angajoqqaavinullu aamma nalilersuissaagut, taakkulu qanoq ingerlariaqqinnerminni atortarsimaneraat paasiniarneqassallutik, Helene Brochmann oqarpoq.
- Atuarfiit aqutsisuinut apeqqutinik nassiussaqarpugut, aggustillu ingerlanerani aamma ilinniartitsisunut nassiussissaagut. Tassunga atatillugu tamarmik tusaaneqarnissaat pingaaruteqarpoq, taamaattumik qanoq akissuteqassanersut pissangagaarput.
Helene Brochmannip suleqatigini peqatigalugu atuarfiit aqqanillit tikissavaat, taakku illoqarfinni nunaqarfinnilu atuarfiit tikissallugit. Atuartitsinermi peqataasassapput, atuarfinni aqutsisut, ilinniartitsut, atuartut, angajoqqaat kiisalu sumiiffinni tikitaminni ingerlatisut oqaloqatigisassallugit. Nalunaarusiaq suliaat 2015-p ukiaani naammassissaaq.