Wednesday, April 19, 2017 - 14:13

Meeqqat annilaartinneqartut: Meeqqanik ussassaarisoqartoq

Sermitsiaq.AG-p meeqqanik ussassaarisoqarneranik uppernarsaatitsiniarluni attaveqarmat, Nuummi politiit suli nalunaarfigineqarsimanngillat.
Assi.: Arkivfoto: Leiff Josefsen
Nuummi Ukaliusami 3. klassimi atuartut marluk angutit marluk pissusilersuutaannut ersingaaramik, atuarfimmi ilinniartitsisut ilaannut qimaasariaqarsimapput.

Meeqqat taakku angutinit marlunnit atuarfiup eqqaani biilit uninngasarfiani angutinik ussassaarneqarsimallutik ilisimatitsisimasut, nukarlerni atuartuni pisortaq, Britta Nielsen, Sermitsiaq.AG-mut ilisimatitsivoq. Taakku 200 aamma 500 koruuninit aningaasat ussassaarutigisimavaat, meeqqallu naapertorlugit biilimut qernertumut ikitinniarsimavaat.

Atuartut taakku sisamat quilerratsakkamik neqeroorut tigunngilaat, ersileramillu Nuuk Centerimut qimaapput, tassanngaanniillu bussinik Nuussuarmut angerlarput.  

Taakkunannga marluk ilinniartitsisut ilaannut bussit unittarfianut qaninnermi najugaqartumut arpapput. Atuartut marluk allat arfineq-pingasut qulingiluallu missaanni ukiullit angerlamut arpapput, meeqqat ilaasa arnaa Facebookimi taama allappoq.  Angutit taakku marluk meeqqat busserneranni malinnaasimasut oqaluttuarput.

Nuummi politiit pisoq pillugu nalunaarfigineqarsimanngillat, kisianni angajoqqaat politiinut attaveqaqqullugit kajumissaarpaat.

Angajoqqaat pisoq atuarfiup avataani pimmat politiinut nalunaarutigisariaqaraat, atuarfiup pisortaa Karno Lynge ilisimatitsivoq.

Atuartunut nukarlernut immikkoortumi pisortap angajoqqaajusut aamma atuarfiup intranetiani nalunaaruteqarniarluni aalajangersimavoq, aqagulu sisamanngornermi klassini pisoq oqaluuserineqarniarpoq.

- Taamatut pisoqartillugu qanoq naaggaartoqarsinnaaneranik atuartullu oqaloqatigiissutiginiarparput. Aap, taamatut pisoqannginnissaa qanoq pinngitsoorneqarsinnaanersoq, Britta Nielsen nassuiaavoq, taassuma ilinniartitsisoq meeqqat qimaaffigisimasaat attaveqarfigisimavaa.

Britta Nielsen siornatigut taamatut pisoqartillugu misigisaqarnikuunngilaq, ''asuliinnaanngitsumillu'' tiguneqartariaqartoq isumaqarpoq.

Seneste nyheder / Nutaarsiassat kingulliit