Inatsisartut
Meeqqat amerlanerunissaannik IA kissaateqarpoq
Ilaqutariittut inuunermut iluaqutaanerusumik Sara Olsvig politikkeqalerusuppoq
Nunatsinni meeqqat inunngortartut ikippallaaqaat, tamannalu iliuuseqarfigineqartariaqarpoq. Inuit Ataqatigiit taama isumaqarput, Naalakkersuisullu ilaqutariittut inuunermut iluaqutaanerusumik politikkimik ineriartortitsinissaat taakku siunnersuutigaat.
- Inuiaqatigiittut isumannaagassaraarput suliffeqaraluarluni meeraqarnerup ajornannginnerulernissaa pilerinarnerulernissaalu aqqutissiutissallutigit, Sara Olsvig (IA) siunnersuummik saqqummiussinermini oqarpoq.
Atuaruk: Ernereernerup kingorna atugarissaarneq
Utoqqaat amerlasuut - inuusuttut amerlanngitsut
Inuusuttut ikilartuinnartut utoqqarnut amerliartuinnartunut pilersuilernissaat, partiip ernumassutigaa. Taamaattumik IA siunnersuuteqarpoq, upernaakkut 2017-imi ataatsimiinnissamut, Naalakkersuisut suliffeqarnermut tunngasunik nassuiaasiornissamik peqquneqassasut.
- Mumiganillu ikorfartuutaasunik aqqutissiussisumik aaliangiisarsinnaanissamik tunngavissinneqarnissaq anguniarlugu, Sara Olsvig (IA) saqqummiinermini oqarpoq.
Atuaruk: GA: Ajornartorsiornissaq qallivoq – qanilligaluttuinnarlunilu
Ernereernermi atukkat
Taassuma ilaatigut angajoqqaat ernereernerup kingorna sulinngiffeqarnermi atugaat isiginiarneqarnissaat kissaatigaa. Tamannalu isuma Nalaakkersuisut isumaqatigaat.
- Erninermut atatillugu sulinngiffeqarneq paaqqinnittarfinnilu neqoroorutit kiisalu inuusuttunut angajoqqaanullu navianartumiittunut tapersiilluni siunnersuisarnermik neqeroorutit siunnersuummi immikkut pingaaruteqarput. Naalakkersuisut tamakku misissuiffigineqarnissaannut isumaq ajunngitsutut isigaat, inuussutissarsiornermut suliffeqarnermullu naalakkersuisoq, Vittus Qujaukitsoq (S) akissuteqarnermini allappoq.
Taassumali nassiuaasiornissamut suliaqarnissaq ukiakkut ataatsimiinnissap tungaanut ingerlanissaa kissaatigaa.
Siunnersuut tapersorsorneqarluarpoq, inuussutissarsiornermullu ataatsimiititaliamut suliassanngortinneqarluni ingerlateqqinneqarpoq.