meeqqanik sumiginnaaneq
Meeqqat 3000-it atornerlugaasut. 110-ginnaat ukiut tallimat iluanni unnerluussaasut
Meeqqanik atornerluisut amerlanerpaartaat pillaatisineq ajorput. Meeqqat nakuusernermut pinngitsaalineqarnermullu illersorneqarnissamut pisinnaatitaaffeqaraluartut, ikitsuinnaat iliuuseqartarput
Misissuinerit arlallit MIO-miillu nalunaarusiat takutippaat meerarpassuit kinguaassiuutimikkut atornerlugaasimasut. Kisitsisit tamanut saqqummiunneqanngitsut, tupaallannartut takutippaat meeqqat nuna tamakkerlugu 3000-it missaanniittut pinngitsaalineqarsimasut imaluunniit allatigut kinguaassiuutimikkut atornerlunneqarsimasut.
Taamaakkaluartorli ikitsuinnaat nalunaarutigineqartarput ikitsuinnaallu unnerluutigineqartarlutik.
Piffissami ukiut tallimat iluanni 2015 tikillugu meeqqanut 15-it inorlugit ukiulinnut kinguaassiuutitigut kanngutsaatsuliornerit eqqartuussivimmut suliassanngortinneqarsimasut 110-ginnaapput. Pinerlunnermi kisitsisit naatsorsueqqissaartarfimmeersuupput.
Suliassarpassuit uninngaannartut
Piffissami tassani aamma kinguaassiuutitigut kanngutsaatsuliornerit meeqqanut tunngasut 270-it nalunaarutigineqarsimapput, tassa imaappoq suliat 60 procentii uninngaannartarput pissutigalugu pinerluuteqartup unnerluunneqarsinnaannginnera politiinit nalilerneqartarmat.
- Kalaallit Nunaanni Danmarkimilu pinerluttulerinermi tunngaviusumik inatsimmi ”kinaassusersiunnginnissaq” unnerluussisussaatitaasutut malittussaavarput, tassalu ima isumaqarpoq suliat eqqartuussivimmi pineqaatissiissutaanavianngitsutut isigisagut ingerlateqqeqqusaanngikkigut, politimesteri Bjørn Tegner Bay oqarpoq.
Lynge: periarfissat tigusigit
Taamaammat oqartussat allat iliuuseqarsinnaatillutik iliuuseqartariaqarput. Taamaasiortoqarsinnaavorlu inersimasut meeraanerminni atornerlugaasimanerminnik avammut saqqummiussigaangata. Taama politikeri Steen Lynge isumaqarpoq.
- Innuttaasut misigisaminnik tamanut saqqummiigaangata pisortat periarfissaatillugu iliuuseqarneq ajorput. Tamanna Gukki Nukap kinguaassiuutitigut atornerluinermut tunngasunik saqqummersitsinerani ersersinneqarpoq, nunatsinnilu atuarfinni assigiinngitsuni periarfissaq atorneqarneq ajorpoq, Steen Lynge Atassummeersoq oqarpoq.
FN-ip isumaqatigiissutaa meeqqanut tunngasoq 1992-mi nunatsinni atuutilerpoq taamaammallu pisortat meeqqat kinguaassiutitigut atornerlugaannginnissaannut illersuinissaminnut pisussaaffeqarput.