akuersissut
Meeqqat 24-t imerniartarfiup silataani utaqqisut
Naalakkersuisut kommunilu Tasiilami isumaginninnermik ajornartorsiutit aaqqinnissaannut ikiuiniarlutik neriorsuipput. Anaanali ataatalu imerniartarfimmiikkaangata kikkut meeqqat isumagissavaat?
Ulloq akissarsiffik inuppassuarnut erngunnissamik isumaqarpoq. Peqqissutsimut Naalakkersuisoqarfiup nakkutilliinermut atatillugu nalunaarusiaani ajornartorsiut taanna aamma sammineqarpoq. Juulimi siunnersortit angalatinneqartut sapaatit akunnerani Tasiilamiipput, tamatumunngalu tunngasunik assigiinngitsunik misigisaqarlutik. Aviisi AG taama allappoq.
Nalunaarusiami maanna tamanit takuneqarsinnaasumi ilaatigut imaattunik atuagassaqarpoq:
- Nakkutilliiartortitat takuniaffigisaminni siullermi (imerniartarfimmi, aaqq.) paasitinneqarput Tasiilami innuttaasut imerniartarfiliartartut sisamanngornermi unnukkut aqqanernut akissarsiat ikineqarniariartullu. Piffissami tassani nakkutilliisut inuit 65-t missaanniittut imerniartarfimmut isertut takuaat. Ilaquttamik aninissaannut meeqqat 24-t utaqqisut nakkutilliisut takuaat. Matumi paarsisoqanngilaq meeqqallu piumamik isertarlutillu anisarput, nakkutilliisut allapput.
Imerniartarfiutililli Mike Nicolaisen isumaqarpoq meeqqat unnukkut kingusissukkut imerniartarfiup silataani katersuuttarnerat imigassallersinnaanermik piginnittunut isorinnissutaasariaqanngitsoq. Paasisinnaanngilaa imigassamik inatsisip malinneqarneranut nakkutilliinermi sooq ajornartorsiut taanna ilanngunneqarnersoq.
- Isumaginninnikkut ajornartorsiutaavoq niuernitsinnut attuumassuteqanngitsoq. Angajoqqaat meeqqaminnik paarsinngippata isumaginnittoqarfik politiilluunniit akuliunneqartariaqarput. Meeqqat unnukkut aqqarnup kingorna aneertussaanngillat, politiillu angerlaqqusariaqarpaat, oqarpoq.
Allaaserisaq tamaat aviisimi AG-mi atuaruk, taanna uani ataani linki tooriarlugu isissutissarsiffigisinnaavat: