Nuuk

Meeqqanut unnuk kulturisiorfik

Ukioq manna unnummi kulturisiorfimmi meeqqanut misigisassarpassuaqassaaq. Unnummi kulturisiorfimmi meeqqanik takuniaaqateqassaguit sunik misigisaqarsinnaanerlusi uani atuaruk

Unnummi Kulturisiorfimmi meeqqat nukarliit utoqqaat inuuniarnikkut atugaat misilissinnaavaat. Assi toqqorsivimmit

Piviusuusaartitamik qulimiguulimmut timmisumut ilaagit, utoqqalilluni qanoq innersoq timinni misigiuk toqusullu nikueqqittut naapikkit. Illoqarfimmi arfininngorpat unnuk kulturisiorfik ingerlanneqalerpat meeqqanut inersimasunullu meeraasaarusuttunut misigisassarpassuaqassaaq.

Tamakkuli tamarmik unnummi ataatsimi angumerineqarsinnaanavianngimmata kisimi ajornartorsiutaassaaq.

Taamaattumik ilaqutariinnut meerartalinnut misigisassanut nassuiaat aajuna, taamaalilluni meeqqat nuannersumik unnussiornissaat qulakkeerneqarsinnaaniassammat.

Bamsi nassarsiuk

Bamsinut napparsimmavik iluatsittumik takuniarneqarsinnaassaaq, tassanimi Peqqinnissamut Isumaginnittoqarfik Nuummi atisanit uumasuliat maavaartut peqqissusaat misissorniarlugit aggersaammat.

Tassani ikinngutit maavaartut aaversissapput aamma qinnguartartillutik assilisissallutik kiisalu nipittartulerneqassallutik. Tassanngaanniit naleqquttumut ingerlaqqilluni kigutileriffiliartoqarsinnaavoq, bamsillu nassatarineqartut aamma tassani isumagineqassallutik.

Bamsi suli nassarlugu Mittarfeqarfiit alakkarneqarsinnaapput, tassani maligaasat atorlugit bamsip ilua misissorneqarsinnaavoq, taamaalilluni bamsip iluanut isertukkanik suugaluarnersunik toqqorsisoqarsimanersoq paasineqarsinnaassalluni.

Tassani aamma meeqqat kiinnamikkut qalipatseriarlutik saniliannut Air Greenlandimut ingerlaqqissinnaapput, tassanimi angisuumik aliikkusersuisoqartussaammat.

Ramasjang Mysteriet, Danmarks Radiumit ilisimaneqartoq, timmisartumut iniliami ukioq manna aliikkusersuisuussaaq. Tassani aamma teqeqqumi nipiliorfiunnginnerusumi, aliikkusersuinerup siornagut kingornagulluunniit ingilluni kalaallit oqaluttuatoqaannik tusarnaartoqarsinnaavoq.

Kiinnap qalipatsinnissaa angumerinngitsoorsimagaanni timmisartortitseqatigiinni tamanna aamma periarfissaassaaq.

Unnuk kulturisiorfimmi Nuummi pisussami pilersaarutit aviisimi Nuuk Ugeavisimi atuarneqarsinnaapput. Aviisi akeqanngitsumik ugguuna aaneqarsinnaavoq:

Powered by Labrador CMS