Sermersooq

Meeqqanut kingunerlutsitsisunut katsorsaavik nutaaq

Kommuneqarfik Sermersooq Nunatsinni siulliulluni meeqqanut kinguaassiutitigut kannguttaatsuliorfigineqarsimasunut katsorsaavimmik aammaalerpoq

Seksuelle overgreb, demonstration, optog, Nuuk
Meeqqanut kinguaassiutitigut kanngutsaatsuliortarnermut Nuummi akerliussutsimik takutitsisut

Nunatsinni katsorsaavik taama ittoq pilersinniarlugu suliaq aallarteruttorpoq, ilimagineqarporlu aggustimi meeqqat siulliit iserterfigeriaannaassagaat, Kommuneqarfik Sermersooq ilisimatitsivoq.

Nunatsinni meeqqat inuusuttullu kannguttaatsuliorfigineqarsimasut amerlavallaarneri pissutaalluni katsorsartarialinnullu katsorsaanermik neqeroorutit amigaataanerat pillugu Kommuneqarfik Sermersuumit aalajangerneqarpoq, meeqqanut taakkununnga Nuummi katsorsaavimmik angerlarsimaffeqartariaqartoq.

Atuaruk: Nutaamik eqqarsartariaaseqarnissaq Meeqqat Illersuisuata ujartorpaa

Ikiuisut ilinniarluarsimasut
Angerlarsimaffimmi ikiorneqarneq ilinniarluarsimasunit neqeroorutigineqassaaq, tamannalu Nunatsinni nutaamik assigiissumillu neqeroorutaassaaq.

- Meeqqat taakku pillugit iliuuseqarnissarput pingaartuuvoq, kingunerlutitsinerannilu katsorsarnissaannut akisussaaffik tigusariaqarparput. Meeqqat kingunilutsitsinerit qaangerniarlugit ilaatigut coping-imik periutsit ilinniassavaat, taamaasillutik misigisimasamik qaangernissaanut namminneerlutik iliuuseqarsinnaalerlutik, Kommuneqarfik Sermersuumi ilaqutariinnut siunnersorti Tina Dam Rasmussen oqarpoq.

Meeqqat tallimat
Meeqqat 12-nit 18-it tikillugit ukiullit tallimat tikillugit angerlarsimaffimmi najugaqarsinnaapput. Katsorsaanermi najugaqatigiiffinni ikittunnguanik najugaqarfigineqartuni katsorsaasarneq pitsaanerpaasoq paasineqarsimavoq.

- Ilisimatusarnermi paasineqarsimavoq, meeqqat eqqornerlugaasimasut annikitsunnguanik avatangiiseqarnissaq pisariaqartikkaat, meeqqat ataasiakkaat tamakkiisumik isigisinnaasaat, Tina Dam Rasmussen oqarpoq.

Suleqatigineqartussaq
Kommuneqarfik Sermersuumi pioreerpoq meeqqat angerlarsimaffiat ingerlalluartoq ‘Tupaarnaq’ , taannalu katsorsaavittut angerlarsimaffimmit pingaarutilimmik suleqatigilluarneqartussaavoq, kommuni ilisimatitsivoq.

Kommuni angerlarsimaffimmut tassunga piukkunnarluartumik maannakkut forstanderissarsiorpoq.

Atuaruk: Inersimasunut meeraarnerminni atornerlutsissimasunut siunnersuineq nutaaq

Powered by Labrador CMS