Meeqqat

Meeqqanut kalaallinut Danmarkimiittunut pilersaaruteqartoqarnissaanut piumasaqartut

Meeqqat kalaallit Danmarkimiittut nammineq oqaatsiminnik atuartinneqartarnissaminnut pisinnaatitaaffeqarput, meeqqat pillugu siunnersuisoqatigiit naqissusiipput.

Meeqqat kalaallit Danmarkimiittut arlallit kiserliorneq misigalugulu atugarliorput. Danmmarkimi meeqqat pillugit siunnersuisoqatigiit nalunaarusiaata nutaap tamanna takutippaa.

Meeqqanut nuna tamakkerlugu iliuusissatut pilersaarusiortoqarnissaanik siunnersuisoqatigiit tamatuma piumasaqartippai.

- Meeqqat kalaallit arlallit meeqqat qimaasut Danmarkimut pigaangamik ajornartorsiutigisartagaasa ilaat misigisaraat takuarput, siunnersuisoqatigiinni siulittaasoq, Per Larsen, Sermitsiaq.AG-mut oqarpoq.

Kulturit aporaannerat
Danskisut isigineqartarput, taamaammat kulturikkut assigiinngissutsit malunnaatillit takunngitsoorneqartarput, tamannalu meeqqanut unammillernartorujussuusinnaavoq.

Meeqqat pillugit siunnersuisoqatigiit meeqqat arfineq-marluk 11-t aamma 15-it akornanni ukiullit apersorlugit misissuisimapput, taakku tamarmik meeqqat ikorfartortariaqartutut nalilerneqarsimapput.

Meeqqat annertunerusumik kiffaanngissuseqarneq aamma ataatsimoorneq Nunatsinni ilisimasartik maqaasillugu, ilaatigut oqaatigaat.

Oqaatsitigut ajornartorsiorneq
Tamatuma saniatigut angajoqqaat arlallit angerlasimaffimminni kalaallisuinnaq oqaluttuupput. Tamannalu atuarfiup tamatigut maluginiarneq ajorpaa, ingammik tikeqqammeraangamik atuarnermi ajornartorsiortitsisarpoq.

- Tikeqqaarama paasisaqarsinnaanngilanga. Ilinniartitsoraluunniit qanoq oqarnersoq paasisinnaanagu, Minik 13-inik ukiulik nalunaarusiami oqaluttuarpoq.

Kisianni meeqqat kalaallisut oqalussinnaajunnaariartortarput, tamannalu angajoqqaanut atatillugu ajornartorsiulersitsisarpoq.

- Angajoqqaatik iluamik oqaloqatigisinnaajunnaaraangamikkit, taava ilaqutariinnikkut aamma inuuniarnikkut annertuumik ajornartorsiortitsisinnaasarput, Per Larsen oqarpoq.

Taamaammat meeqqat pillugu siunnersuisoqatigiit piumasaraat, meeqqat atuarfimmi kalaallisut atuartinneqartassasut. Tamanna pisinnaatitaaffigaat, kisianni meeqqat arfineq-marluusunit marluinnaat oqaatsitik atorlugit atuartinneqartarput.

- Naalakkersuisut aamma folketingi paasitikkusuppagut, kisianni aamma nunap teqeqqui tamakkerlugit, meeqqat taakku maluginiarneqarnissaat oqariartuutigerusuppagut, siunnersuisoqatigiit siulittaasuat oqarpoq.

Pimmatiginninneq
Meeqqat kiserliorajuttarput, ikinngutissaaleqillutik aamma kalaallit ikinngutitik maqaasillugit. Tamatuma saniatigut pimmatigineqartarput, kalaallillu imerajuttut pillugit isummanik pigiliutiinnakkanik naammattuuisarlutik.

- Maani Danmarkimi tamatta nerinerup nalaani qanoq oqaluttarnerluta akisussaaffigaarput, isummat pigiliutiinnakkagut oqaatigigaangatsigit meeqqat katersortarpaat, Per Larsen oqarpoq.

Danmarkimi meeqqat atuarfiini Kalaallit Nunaat pillugu atuartitsineq nukittorsarneqartariaqartoq, meeqqat pillugit siunnersuisoqatigiiffik taamaattumik isumaqarpoq, danskit meerartaat kalaallit innuttaasut aamma kulturiat assigiinngisitaarnerusumik paasisaqarfiginiassammassuk.

Powered by Labrador CMS