Kommune Kujalleq
Meeqqanut inuusuttunullu atugarliortunut sullissineq nukittorsaraat
Isumaginninnermut naalakkersuisup Martha Lund Olsenip (S) Kommune Kujallermik suleqateqarneq killiffissiorniarlugu meeqqanut inuusuttunullu aamma iliuuseqarneq pitsanngorsarniarlugu Qaqortumut tikeraarpoq
Isumaginninnermut naalakkersuisoq Martha Lund Olsen (S) aamma Kommune Kujallermi borgmesteri Jørgen Wæver (S) Johansen, kommunimi meeqqanik inuusuttunillu isumaginninnikkut sullissinerup, taamatuttaaq isumaginninnermik suliassaqarfiup aaqqissuussaanerata pitsanngorsarneqarnissaa siunertaralugu suleqatigiinnissamik isumaqatigiissutip timitalersorneqarnera killiffissiorniarlugu ataatsimiipput.
Oqaluuserisassani immikkoortoq pingaarnerpaaq tassaavoq, Kommune Kujallermi meeqqat inuusuttuaqqallu ikiortariallit isumagineqarnerannik nukittorsaaneq pillugu suleqatigiinnerup killiffianik ilisimatitseqatigiinneq.
Atuaruk: Meeqqat illersuisuat Kujallermi pisut eqqasuutigai
Kommunimut iluaqutaangaatsiartoq
Meeqqanut inuusuttuaqqanullu tunngasutigut Kommune Kujalliup unammilligai oqaluuseriniarlugit ataatsimeeqqatigiinneq tamanut iluaqutaasoq, borgmesteri tusagassiuutinut nalunaarummi oqarpoq.
- Immitsinnut neriorsoqatigiippugut meeqqat ikiortariallit pisinnaatitaaffii isumannaarniarlugit suliniarneq ukiuni tulliuttuni anguniakkatsinni pingaarnerpaajussasoq, taamatuttaaq Kommune nuannaartunik, peqqissunik imminnullu naleqartittunik, siunissami unammilligassanut nukissaqarluarlutillu piareersimasunik meerartalik nangittumik ineriartortinneqarsinnaaqqullugu qanimut suleqatigiinnerput nangissagipput, Jørgen Wæver Johansen oqarpoq.
Atuaruk: Kommune Kujalleq isumaginninnerup tungaatigut ikiortissarsiorpoq
Aarhusip kommunianik suleqateqarneq
Martha Lund Olsenip tamatumani annertuumik siuariartoqarsimasoq maluginiarpaa.
- Suliassaqarfiup iluani assut siuariartoqarsimasoq maluginiarpara, taamatuttaaq maluginiarpara Kommunip isumaginninnerup tungaatigut aaqqiiniarluni ilungersortoq, ilaatigut siunnerfeqaqqissaarluni sulisunik suliaminnut ilinniarluarsimasunik piginnaasaqarluartunillu pissarsiniarluni tamaviaartoq, taanna erseqqissaavoq.
Aarhus Kommune qaammatini kingullerni kommunimut meeqqat atugarliortut pillugu sulianut ikiuunnikuuvoq.
Suil suliassarpassuaqartoq
- Kommunimi isumaginnittoqarfiup aaqqissugaaneranik patajaallisaanitsinni piffissaqalerlutalu nukissaqalerpugut, tamannalu innuttaasunut minnerunngitsumillu isumaginnittoqarfimmi sulisutsinnut iluaqutaaqaaq. Suli suliassarpassuaqarnerput ilisimavarput, nakimanangali oqarsinnaavunga ilorraap tungaanut aallarsimasugut, borgmester Jørgen Wæver Johansen tapersiivoq.
Isumaginninneq nukittorsarniarlugu Kommune Kujalliup, Namminersorlutik Oqartussat kiisalu Aarhusip suleqatigiinneranik nukittorsaaneq 2016-imi upernaakkut Kommune Kujalliup suliniuteqarneratigut piviusunngortinneqarpoq.
Atuaruk: MIO-p Kommune Kujalleq nersualaarpaa