Meeqqanut immikkoortoq ullutsinnut naapertuuttoq, qujanaq

Peqqissaasut Kattuffiata/Peqqinnissaq Pillugu Kattuffiup Meeqqat Illersuisuat taperserpaat, taassuma meeqqat napparsimmavissuarmut unitsinneqartut atugaat ernumanartoqartimmagit, peqqinnissamullu naalakkersuisumit akissuteqarfigineqaqqulluni

Peqqissaasut Kattuffiat/ Peqqinnissaq Pillugu Kattuffiit (PK/PPK) meeqqat illersuisuata Napparsimmavissuarmi meeqqanut tunngatillugu pissutsit- ukiut tamaasa inissani arfineq pingasuusuni meeqqat ukioqanngitsuniit 15-inik ukiullit 3000-it missaasa uninngavigisartagaanni- pissutsinik ernumanartutut naliliinera isumaqataaffigaat.

Meeqqat illersuisuata Aaja Chemnitz Larsenip meeqqat Dronning Ingridip Napparsimmavissuanut unitsinneqartartut pitsaanerusumik atugaqalernissaannik kajumissaarutaa Peqqissaasut Kattuffiannit/Peqqinnissaq Pillugu Kattuffimmit taperserneqarpoq.
Tamanna pivoq tusagassiorfinnut nalunaarutikkut, tassuuna siulittaasup Inuuti Fleischerip peqqinnissaqarfimmi qullersat qinnuigalugit meeqqanut immikkoortoqarfik ullutsinnut naleqqunnerusoq.
Aamma atuaruk: Meeqqat illersuisuata DIH-mi pissutsit pitsaanerusut piumasarai
– Peqqinnissaqarfiup qullersaqarfiata pisortai suliffeqarfissuit allatulli, pisariaqartitsineq naapertorlugu nukissanik naammatusaariniarluni ilungersuuteqarnera PK/PPK -p soorunami paasisinnaavaa, PK/PPK-lli meeqqat immikkoortortaqarfianni ajornartorsiutip nutaamik iseqarluni – ilaatigut inissaaleqinerup meeqqallu pisariaqartitaasa sapinngisaq tamaat naleqqunnerpaamik piviusunngortinnissaat anguniarlugu, peqqissaanermik sullissisutigut pitsanngorsaanissap piginnaanngorsaanissallu isiginiarneqarnissaannut, peqqinnissaqarfiup qullersaqarfia kajumissaarusuppaa, Inuuti Fleischer allappoq.
Taassuma tikkuarpaa meeqqat napparsimasut akornuserneqaratik periarfissinneqarnissamut inissamik pisariaqartitsisut, uninnganerisalu nalaani angajoqqaavisa aamma inissaqartinneqarnissaat pisariaqartinneqartoq.
– Meeqqamut angajoqqaamulluunniit ingiallortaasumut pitsaasunik illersorneqarsinnaasunillu meeqqap peqqissilertornissaanut iluaqutaasunik atugassinneqannginneq naapertuuttuunngilaq, Ilinniagaqassuseq tunngavigalugu peqqissaanermik nakorsaanermillu suliaqartut sulisullu allat, piffissamik nukissanillu pisariaqartitanik tunineqarnissaat PK/PPK-miit isigalugu pingaaruteqarpoq. Meeqqat uninngavianni sulisut Dronning Ingridip Napparsimmavissuani sulisutut allatulli - PK/ PPK-ip naliliinera naapertorlugu Napparsimmavissuarmi immikkoortortani siniffiit uninngavissat sipporlugit uninngasoqartuarneranit suliassallu annertusiartuinnarnerinit annertuumik ilungersortitaapput, ullullu tamakkiallugit nukissanik tunineqarnissaq utaqqilussinnartarlugu.
– Asasarput Peqqissutsimut Naalakkersuisoq: Qaqugumita Napparsimmavissuaq ullutsinnut naapertuuttumik meeqqat, angajoqqaat sulisullu pisariaqartitaannik eqquutsitsisumik meeqqanut immikkoortortaqalissava, Inuuti Fleischer oqarpoq.

Powered by Labrador CMS