meeqqanik ussassaarisut
Meeqqanik ussiiniartoqarnera Sermersuup ilungersunarnerarpaa
Meeqqat ilisarisimanngisaminnit usserniarneqartillutik naameertarnissaannik angajoqqaat tamarmik meeqqatik oqaloqatigissagaat Kommuneqarfik Sermersooq inassuteqarpoq. Uani sapaatip-akunnerani atuarfiup Ukaliusap eqqaani nuanninngitsumik pisoqarnerata kingorna inassuteqartoqarpoq.
Angutit marluk atuartut pingasut 200 aamma 500 koruuninik tunillugit atuarfiup Ukaliusap eqqaani pingasunngormat usserniarsarisimavaat. Meeqqalli silatusaarlutik qisuariarlutik angerlapallapput.
Atuaruk: Meeqqat annilaartinneqartut: Meeqqanik ussassaarisoqartoq
Kommuneqarfik Sermersooq maanna angajoqqaat meeqqatik ilisarisimanngisaminnik oqaloqatiginnittannginnissaannik oqaloqatiginneqquai.
Ukaliusami pisoq ilugesunartutut isigaarput, Kommuneqarfik Sermersuumi atuarfeqarnermut immikkoortortaqarfimmi qullersaq, Jesper Madsen oqarpoq imalu nangilluni oqarluni:
Oqariartuut meeqqat uteqqissavaat
- Ukaliusami meeqqat katersuutsinneqarneranni pisoq oqaloqatigiissutigineqarlunilu meeqqat apeqqutaat ilinniartitsisunit akineqartarput. Meeqqallu pisumut assigusumik naammattoorsissagaluarpata ilisarisimanngisaminnut naameertarnissaat ilinniartitsisunit kaammattuutigineqarpoq. Taamaattumik angajoqqaat aamma kaammattorusuppagut meeqqaminnik pisoq pillugu oqaloqateqarnissaannik oqarfigalugillu ilisarisimanngisaminnik naammattoorsigunik akiliillutik ilaserinnittunik, meeqqat naameertarnissaannik oqartaqqullugit. Meeqqat taama angajoqqaanit atuarfimmilu sulisunit arlaleriarlutik oqaluttuunneqartarnissaat pingaaruteqarpoq.
Politiit suli oqaaseqanngitsut
Pisoq kingorna politiinut nalunaarutigineqarpoq, taakku suliamik misissuineq aallartippaat. Taakku sisamanngornermi nalunaarutigaat takunnittoq pissarsiariniarsaralugu, kisianni politiit pasisanik nassaangajalernerlutik oqaaseqarsinnaanngillat.
Atuaruk: Meeqqanik ussassaarisartut politiit misissuiffigaat
Kisianni saaffiginnissutit amerlammata suliaq maluginiarneqarluartoq oqaatigaat.
Pisoq pillugu aamma Facebookimi allaaserineqartorujussuuvoq, tamannalu ilaatigut assigiinngitsunut sangutitsisinnaasarpoq.