meeqqat inuusuttullu

Meeqqanik sullissisut peqatigiit: Meeqqat kikkulluunniit kiserliorlutik alliartussanngillat

Suliniaqatigiiffiit arlaqartut ataatsimut meeqqanut inuusuttuaqqanullu suliniuteqalerput. Inuunerinnissaq aamma eqqarsaatigineqarpoq

Assi toqqorsivimmit - assi allaaserineqartumut attuumassuteqanngilaq

Ataatsimooraanni nukittunerulertoqartarpoq.

'Meeqqanik sullissisut peqatigiit' tassaasut MIO, Foreningen Grønlandske Børn, INUA - Kalaallit Røde Korsiat, Inooqat, Sorlak, Red Barnet Grønland, Meeqqat Inuunerissut aamma Nanu Børn taama oqariartuuteqarput.

Maanna kattuffiit meeqqanik sullissisut peqatigiit kalaallit inuiaqatigiinni meeqqat inuusuttullu atugarisamikkut annertunerusumik ukkanneqalernissaat anguniarlugu suleqatigiilerput, ataatsimut tusagassiutinut nalunaaruteqarput.

Meeqqat pisinnaatitaaffii pillugit sullissivik MIO suleqatigiinnik aallarniivoq assullu NGO-mik suliaqartut tapersersuinerat nuannaarutigaa. Kattuffiit tamarmik meeqqat pitsaanerusumik inuuneqalernissaannik anguaniagaq ataaseq anguniarlugu suliaqartuupput, assigiinngeqisumilli suleriaaseqarlutik – assigiinngissutitilli assut nukittoqqutigivaat.

Meeqqat kiserliortarnerat
Siusinnerusumi misissuinerup takutippaa meeqqat atuarfianni atuartut annerit 8 procentii angungajallugit akulitsisumik kiserliortartuusut. 'Iggu' 2014-imit aningaasat katersukkat tamatumunnga atorneqassapput.

- Meeqqat illorisimaarlutik inuunissaannut annermik akisussaasuupput angajoqqaat. Meeqqat kiserliorlutik maqaasisaqarlutillu inuusut immikkut ittumik inersimasumik aniatitsiffigisinnaasaminnik pisariaqartitsisinnaapput, Peqatigiiffik Kalaallit Meerartaata pisortaa Tina Frausing tusagassiutinut nalunaarummi oqarpoq.

Angerlarsimaffinni annerusumik oqaloqatigiittarnissamut kaammattuivoq, aamma meeqqanik ulluinnarni sullissisut kaammattorpai meeqqat kiserliortutut pissuseqartut eqqumaffigeqqullugit.

Meeqqanik sullissisut peqatigiit meeqqanik inuusuttunillu sullissisunut kattuffinnut tamanut ammavoq, aamma FN-ip meeqqat pillugit isumaqatigiissutaanik aallaaveqarlutik sullissisuusinnaapput taamatullu sullissisut peqatigiinnut peqataaniarlutik saaffiginnissinnaapput.

Powered by Labrador CMS