siunnersuut
Meeqqanik atornerluisartut kikkuunersut paasineqarnissaat Lyngemit kissaatigineqarpoq
Sumi pisarpat, kikkut taamaaliortarpat, qaqugukkut taamaaliortarpat? meeqqanik kinguaassiuutitigut atornerluisarneq pinaveersaartinniarlugu aarlerinartut suunerinik siammarterisoqarnissaa Steen Lyngep, Atassummeersup siunnersuutigaa
Paasisat pisussaaffiliisarput, politikeri Steen Lynge Atassummeersoq oqarpoq, taanna isumaqarpoq meeqqanik kinguaassiuutitigut atornerluisarnerit pinaveersaartinniaraanni suut aarlerinartuunersut paasititsissutigineqartariaqartoq, taamaattoqarpammi meeqqanik kinguaassiuutitigut atornerluinerit pinaveersaartinneqarsinnaammata.
- Qanoq pisoqartillugu atornerluinerit pisarnersut qanorlu pinaveersaartinneqarsinnaanersut nassuiarneqartariaqarpoq. Aarlerisaarinerit paasissutissiinikkut atorneqarsinnaapput inuiaqatigiillu akisussaaffimmik tigusinissaannik pisussaaffiliissallutik, Steen Lynge isumaqarpoq.
Atornerluisarnerit pinaveersaartinneqassapput
Taanna isumaqarpoq meeqqat atornerlugaasartutut pasisat paasiniaaviginissaat naammanngitsoq. Atornerluinerit pinnginnissaat anguniarlugu pinaveersaartitsinerit annertunerusut ingerlanneqartariaqarput.
- Piffissap ilaannaatigut inuiaqatigiinni meeqqanik kinguaassiuutitigut atornerluisarnernik oqallittoqartarnera naammanngilaq. Nalunaarusiat meeqqanik atornerluinermut sumiginnaanermullu tunngasut saqqummiunneqartarput, inuillu ataasiakkaat akisussaaffimmik tigusillutik eqqumiitsuliornikkut nittartakkatigulluunniit naapeqatigiittarfitsigut misigisaminnik saqqummiussisarput. Tamakkuli saqqummereernerisa kingorna inuiaqatigiinni oqallittoqarunnaartarpoq, Steen Lynge oqarpoq
Tamatta akisussaaqataavugut
Taassuma paasissutissat piffissap ingerlanerani takkuttartut oqartussanit akisussaasunit atorneqartarnissaat ujartorpaa, taakkulu periusissatut pilersaarusiornermi atorneqartarnissaat paasissutissallu inuiaqatigiinnut ilisimasalinnut innuttaasunullu siammarterneqartarnissaat kissaatigaa.
- Innuttaasut tamarmik aarlerinartunut eqqumanerulissagaluarput pinaveersaartitseqataallutillu, Steen Lynge isumaqarpoq.