kinguaassiuutitigut atornerluineq
Meeqqanik atornerluinermik nalunaarutit ikileriarujussuarnerat tupigusuutigaat
Meeqqanik sumiginnaanermik immikkut ilisimasalik kiisalu Foreningen Grønlandske Børn isumaqarput, siusippallaartoq neriuutigissallugu Kalaallit Nunaata ajornartorsiummi annerpaartaasa ilaat qaangersimagaa
Sisamanngormat politiit nalunaarutigaat nunami pinerlunnerit suli ikiliartortut, taamaasilluni pinerlunnermik nalunaarutigineqartut aatsaat taama ikitsigilersimllutik.
Meeqqanik kinguaassiuutitigut atornerluinermik nalunaarutigineqartut aamma ikileriarsimapput, 2013-imi 70-iniit 2015-imi 31-inut.
Kisitsisilli nuannaarutissartaqaraluartut allaqarpoq tupigusuutiginnittunik, DR tallimanngormat oqaluttuarpoq.
Pisut arajutsisat?
Foreningen Grønlandske Børnimi generalsekretærip Puk Draibyp, meeqqanillu ilisimatuup Else Christensenip tupigusuutigaat meeqqanik kinguaassiuutitigut atornerluinermik nalunaarutigineqartut amerlanerunngimmata, tamanna atugaasorujussuunerarneqarmat sammineqartorujussuanngorsimallunilu.
– Nammineq misissuisarnermut naapertorlugu Kalaallillu Nunaanni nalinginnaasumik ilisimaneqartutut meeqqat inuusuttullu amerlajaaqaat kinguaassiuutitigut atornerlunneqarsimasut, Else Christensen Danmarks Radiop Radioavisianut oqarpoq.
Kisitsisini suut pineqarnersut paaserusuppaa
– Taamaattumik isumaqarpunga kinguaassiuutitigut atornerluinermik nalunaarutigineqartut kisitsisit nutaat ikittuararsuusut.
– Taamaattumik pssanganassagaluarpoq paasissallugu suliassat suut nalunaarutigineqarsimanersut, innuttaasullu suliassat qanoq nalunaarutigisimaneraat, ilisimatooq itisiliivoq.
Pingajorarterutaat
Else Christensenip ukiuni arlalinni misissuisarsimanerisa takutippaa Kalaallit Nunaanni niviarsiaqqat pingajorarterutaat angullugit kinguaassiuutitigut atornerlunneqartarsimasut.
Inatsisinik unioqqutitsinermik kisisisitigut takussutissat pitsanngoriaraluartut suli kinguaassiuutitigut pinerlunnermik nalunaarutigineqartut ima amerlatigaat, innuttaasut amerlassusaannut sanilliullugu Danmarkimit quleriaammik amerlanerullutik, aammalu pinngitsaaliisarnerit amerliartorlutik, Nuummi, Qaqortumi Tasiilamilu amerlanersaallutik.