Qaanaaq

Mattak timmisartukkut nassiunneqarpoq

Qilalukkap mattaa 600 kilo Qaanaamiit Nuummut nassiunneqarpoq

Taakku mattaat 600 kiilut Royal Greenlandip Qaanaami tunisassiorfianit nassiussat kingulliussapput. Aappaagu septemberimi tulliani nassiussisoqaqqissaaq

Qilalukkat mattaat 600 kiilut Qaanaami tunitsivimmiit Nuummi Royal Greenlandip tunisassiorfianut uani sapaatip-akunnerani nassiunneqassapput, Royal Greenland ilisimatitsivoq.

Atuaruk: Mattak aamma saarullik panertoq pisiarineqarluartoq

Aggorneqassapput
- Mattaat 600 kiilut pingasunngorpat Nuummut nassiunneqassapput. Pisiniarfinnut nassiutinnginnerini Nuummi tunisassiorfimmi aggoqqinneqassapput poortorneqarlutillu, Royal Greenlandimi Nunatsinni tunisassianik tuniniaavimmi tuniniaanermik ingerlatsisoq Malik Hegelund Olsen, Royal Greenlandip nittartagaanut oqarpoq.

Atuaruk: Nakorsaq mianersoqqusisoq: Miluumasunik imarmiunik nerinasi

Akisunerussanngitsoq
Qilalukkat mattaat timmisartukkut nassiunneqassapput, tuniniarneranili akinut sunniuteqassanngilaq.

- Soorunami timmisartukkut nassiussineq akisuneruvoq, kisianni kalaaliminernik nassiussineq Air Greenlandip akikillinikuuai. Aamma missingersuinitsinni mattaat ilaat umiarsuakkut aamma timmisartukkut nassiunnissaat naatsorsuutiginikuuarput. Taamaattumik mattaat timmisartukkut nassiunneqartut tuniniaanermi akiinut sunniuteqassanngilaq, Malik Hegelund Olsen oqarpoq.

Septemberimi
Ukioq manna septemberi naalersoq mattaat 5 tonsit Qaanaamiit Nuummut umiarsuarmik assartorneqareernikuupput.

Aappagu septemberimi Qaanaamiit mattannik nassiusisoqaqqissaaq.

Atuaruk: Mattammik tillinniarnermi innuttaasunit ikiorneqarnissartik politiit neriuutigaat

Powered by Labrador CMS