Arnanut

Mattak, suaasat aromatillu mamarilluarpai

Meeraagallarami qimussissalluni nuannarisorujussuuaa ikinngutinilu tunumiusut oqaluuttarlugit. Ullumikkut QallunaatNunaanni mutinik atisaliortartut silarsuaanni pissaaneqarnerpaanut ilaavoq.

- Puisimik suaasalianik nererusuppunga.

As Øland Great Greenlandimi siulersuisuni ilaasortanngorami Qaqortumullu siulersuisuni siullermeerluni ataatsimiigialerami tassa kissaataasa annersaat. As Upernavimmi Ittoqqortoormiinilu peroriartorpoq, naallu ukiorpassuarni suaasatorsimanngikkaluarluni meeraalluni mamarilluarsimasani suli eqqaamalluarpai.

Nererusutanili imaasiallaannaq pisinnaasimanngilai. Qaqortumimi neriniartarfiit puisinik suaasaliorneq ajorput, Great Greenlandillu pisortaata Ditte Sorknæsip siulersuisuni ilaasortap kissaataa piviusunngorniassammat piniartoq Qaqortormioq puisimik pisaqarsinnaanersoq suaasaliorsinnaanersorlu aperaa.

- Ditte taamaaliormat qujanaqaaq, suppilu meeraallunga eqqaamasattut mamartigaaq, As Øland oqarpoq.

Siulersuisuni ilaasortat nutaat Great Greenlandimit siunertalimmik toqqarneqarput. As Øland Dansk Mode & Textilimi nutaanik pilersitsisartutut pisortaavoq. Siornatigullu atuagassiami Eurowomanimi mutinut tunngasunik aaqqissuisuunikuulluni. 2015-imi Qallunaat Nunaanni mutinik atisaliortartut silarsuaanni pissaaneqarnerpaat ilaattut toqqarneqarpoq.

As-ip angutaa, Arne Øland, nunatsinni ukiorpassuarni ilinniartitsisutut sulisimavoq. Taamaammallu nunatsinni peroriartorsimalluni - ukiuni siullerni marlunni Upernavimmi inunngorfimmini najugaqarsimavoq, taassumalu kingorna tunumi Ittoqqortoormiini ataatamini najugaqarsimalluni. As qulinik ukioqarluni aninilu Jeppe Københavnimut anaanaminnut nuupput, angajoqqaatik avimmata.

Naak nunarput As-mut pingaaruteqartorujussuugaluartoq Qallunaat Nunaannut utereernermi kingornatigut nunatsinneeqqissimanngilaq, aatsaallu Great Greenlandip siulersuisuini ilaasortaalernissaminik neqeroorfigitikkami nunatsinnukaqqissimalluni.

- Kalaallit Nunaanniit sianerfigineqarsimanera takullugu assut attortippunga. Great Greenlandip siulersuisuini ilaasortanngorusunnerlunga aperineqarama nangaarianngiivillunga akuersivunga, oqarpoq.

Allaaserisaq Arnanut aviisimi kingullermi saqqummertumi tamaat atuaruk:

Powered by Labrador CMS