Mattak aamma saarullik panertoq pisiarineqarluartoq

Royal Greenland ukiumi tuniniaaffiusumi 2014-15-imi 20 millionit koruuninik kaaviiartitaqarput mattammik, qullukkanik aamma saarullinnik issimit panertitanik ilaatigut Nunatsinni tunisinerminnit.

Rekorti
Taakku isertitat Nunatsinni tunisassianik tuniniaavimmi tuniniaasut pingasut siorna isertitarisaanniit 17,5 millionit koruuniusunit 2,5 millioner koruuninik amerlanerupput, Royal Greenland ilisimatitsivoq.

- Ukiumi tuniniaaffiusumi 2014-15-imi kalaaliminernik tuniniaanitsigut 20 millioner koruunit anguagut, aatsaat taamak tunisaqartigaagut, suliffeqarfiup nittartagaanut tulluusimaarluni taama oqarpoq, Nunatsinni tunisassianik tuniniaavimmi tuniniaanermik ingerlatsisoq Malik Hegelund Olsen.

Pisiniarfinnut
- Nunatsinni tunisassianik tunisineq ukiuni kingullerni annertusiartuinnavippoq, kisianni qullukkanik, mattammik aamma saarulliit issimut panertitanik tunisat ukiuni kingullerni amerleriarput, Malik Hegelung Olsen oqarpoq.

Tunisassiat amerlanerpaartaat nunatsinni pisiniarfinnit Pilersuisoq A/S-imut, Pisiffimmut aammalu Kalaallit Nunaanni Brugseninut tunineqarput. Københavnimi kalaaliminernik tuniniaavik Tranhuset aamma Danmarkimi Kalaallit Illuutaat aamma kalaaliminernik pisisartuupput.

Ineriartortitsineq
Nunatsinni tunisassianik tuniniaavimmi tuniniaasartutut sulisut pingasut nunatsinni tunisassianik tuniniaaneq isumagisaraat. Taakku ilaat Ingo Hansen, ukiuni kingulliunerusuni nunatsinni tunisassianik tuniniaaneq annertusiartuinnavissimasoq oqaluttuarpoq.

- Uanga 2008-mi Nunatsinni tunisasianik tuniniaavimmi tuniniaasutut sulilerama tunisassiat millionit koruunit tallimat missingisa nalinginut ukiumut kaaviiaartinneqartarput, Ingo Hansen nittartakkamut oqaluttuarpoq.

Taassuma suleqatinilu Kaassannguaq Zeeb ulluinnarni pisisartunut atassuteqartarlutik tuniniaasaarput.

- Pilersaarusiorluarneq, pisisartunut atassuteqarluarneq aammalu ukiuni pingasunik kingullerni tunisassiat akiisa appartinneqartarneri kalaaliminernik tunisinerup annertusineranut pissutaaqataapput, Ingo Hansen oqarpoq.

Annertussiartuinnartoq
Royal Greenlandip tunisaqarnini annertusiartuinnassasoq naatsorsuutigaa.

- 2019-imi nunatsinni tunisassianik tunisinitsigut 40 milloner koruunit nalingini pallillugit kaaviiaartitsinissarput anguniarparput. Tunisassiat ineriartortinneqarsinnaanerat neriunaateqarpoq, uagulluineriartortitsinnaaneq atorluarusupparput, Malik Hegelund Olsen oqarpoq.

Atuaruk: Mattammik tillinniarnermi innuttaasunit ikiorneqarnissartik politiit neriuutigaat