ujakkaarneq
Martin Møller OL-mut anngutinngitsoorpoq
Ujakkaartartoq Nunatsinneersoq napparsimanini pissutingalugu OL-imut anngutinngitsoorpoq. Ajorunnaarnissanili isumalluaatigalugu
Ujakkaarnermi nunarsuarmi pissartanngorniunnermut anngutereerluni Martin Møller nuffaserlunilu napparsimalerpoq.
World Cup-imut peqataanngitsoorpoq, tullianilu arpannissamut Lillehammerimi Norgemi ingerlanneqartussami suli peqqissinani aallaqataavoq.
Misiliivoq
- 90 procentiinnaagaluarlunga ujakkaarnissannut ajornaviarnanga isumaqaraluarpunga. Misiliisariaqarlungalu. OL-mullu anngutingajavikkaluarlunga, Martin Møller oqarpoq.
Ujakkaarnermi kilometerini qulini OL-mut anngunnissamut piumasaqaat 20 sekundimik inortulaarlugu apuuffissamut apuuppoq.
Naammagittarnerusariaqarpoq
OL-mut anngunnissaq qaammat una angussallugu ujakkaartartup Nunatsinneersup naatsorsuutigisimagaluarpaa.
- Napparsimalerluni uggornaraluaqaaq pitsaanerpaamillu timersornaveerluni. OL-ertoqarnissaanullu suli ukioq ataaseq sinneqarpoq. Tunniutiinnarunnanngilanga ukiullu ingerlanerani pitsaanerusumik piumaarlunga, Martin Møller OL-mut anngunnissaminut misileeqqissinnaasoq oqarpoq.
Taanna maanna Nuummut angerlareerpoq, sungiusarlualeruttorlunilu World Cup-imut Sverigemi januaariip 21-ni peqataanissaminut.
Ukiami OL-erneq Sydkoreami 2018-mi ingerlanneqassaaq.