ujakkaarneq
Martin Møller OL-mut anngunnissamut periarfissaq siulleq annaavaa
Arfininngormat unammersuaartoqarnerani kalaaleq ujakkaartartoq Ukiukkut OL-ertoqarnissaanut anngussinnaasimangaluarpoq. Martin Møllerillu tassani anngunnissani iluatsinngitsoorpaa
- Ingerlanerluppunga (ujakkaarnermi aaqq.) neriuutigiinnarparalu ullulussimanngikkuma sisoaraatikka ajoquteqalaarsimassasut.
Kalaaleq ujakkaartartoq Martin Møller, arfininngormat Schweizip illoqarfiani, Davos-imi, 15 kilometerinut isorartutigisumut ujakkaarnermi peqataasoq, oqarpoq.
Taanna peqataasuni naammassisut 109-t akornanni 105-iulluni apuuppoq.
Taamaasilluni Martin Møller Ukiukkut OL-ertoqarnissaanut, februarip qaammataani Korea Kujallermi ingerlanneqartussamut, anngutinngitsoorpoq.
- Piffissami kingullermi piareersarluarsimallunga misigisimangaluarpunga piffissamilu sivisuumi sungiusarluarnikuullunga. Ullumikkulli OL-mut anngunnissara pikkoriffigivallaanngilara, ujakkaartartoq oqarpoq.
Taamaattoq Martin Møller Ukiukkut OL-ertoqarnissaanut anngunissamut suli periarfissaqarpoq.
- Italiami arfininngorpat 15 kilometerinut isorartutigisumi ujakkaartoqalerpat nutaamik periarfissaqarpunga. Tassani peqataassaanga OL-mullu piumasaqaatit naammassillugit, kalaaleq ujakkaartartoq oqarpoq.