Sisimiut
Martin Møller Arctic Circle Racemi ajugaavoq
Arctic Circle Racemi ingerlaarfik kingulleq sila peqqutaalluni unitsiinnarneqarpoq sapaatiummat. Taamaasilluni Martin Møller angutit 160 kilometerimut unammineranni ajugaavoq
Ajugaasussatut naatsorsuutigineqartoq Martin Møller Arctic Circle Racep 19-ssaani ingerlanneqartumi ajugaavoq.
Unamminermi arfinilissaa ajugaavoq.
Arctic Circle Racemi aaqqissuisut aalajangerpaat sapaatiummat, unammineq kingulleq unitsiinnarneqassasoq.
Ujakkaarnermi neriunaatilik Aasiammiu Karl-Peter Kristensen aappaattut inissippoq angutit 160 kilometerimut unammineranni. Iluliarmiu Frederik Petersen sisamaattut inissippoq.
Arnat 160 kilometerimut unammineranni tjekkiarmiu Kamila Borutova ajugaavoq kiisalu Marie Lundblad kalaallini angusarissaarnerpaalluni, sisamaattut inissikkami.
Arctic Winter Gamesimi General Manageri Maliina Abelsen arnat 100 kilometerimut unammineranni ajugaasuuvoq, Simigaq Broberg aamma Karen Vindfeld aappaattut pingajuattullu inissittut. Vittus Heilmann angutit 100 kilometerimut unammineranni ajugaasuuvoq, Pavia Tobiassen aappaattut inissittoq kiisalu Ivik Jensen pingajuattut inissilluni.
Sisimiut Timersortarfiani ajugaasunut ujamminik tunniussisoqassaaq ataasinngornerup unnukkuani.
Angusat tamarmik uani takukkit
Arctic Circle Race pillugu allaaserineqartut tamaasa uani takukkit