sisoraatinik oqilaniunneq
Martin Møller sæsonimi aatsaat taama angusarissaartigisoq
Kalaaleq sisoraatinik oqilaniuttartoq Sverigemi World Cupimi unamminermi peqataavoq
Danmarkimi pissartanngorniunnermi peqataareerluni kalaaleq sisoraatinik oqilaniuttartoq Martin Møller sapaatiummat Sverigemi illoqarfimmi Falunimi World Cupimi unamminermi peqataavoq.
Unammiffik 10 kilometerinik isortartussuseqarpoq, qangatuullu oqilaniuttoqarluni, aqqutaanilu arpaffimmut ilaavoq sivingasoq qummukarfissaq 500 metrerinik takissusilik.
Angusani naammagisimaarpaa
– Ajappaartorneq sungusartorujussuusimavara pitsanngoriaatigisimaqalugulu. Tamanna iluaqutigisorujussuuvara pujassarnermut pissutsit ajornakusoorsimammata. Festesmøringilu annikinnerusumik atorpara qattunertigut mikinertigut qummukarninni talikka atoretarlugit, taanna Sermitsiaq.AG-mut oqaluttuarpoq.
Russimit ajugaasumit minutsinik pingasunik kigaannerulluni apuuppoq. FIS-pointinik sapinngisamik ikittunik pissarsiniartoqartarpoq, taannalu 98-inik FIS-pointinnappoq, tassa sæsoni manna World Cupimi aatsaat taama angusarissaartigaluni.
Aallarnerliorneq akeqarpoq
Aqaguani, ataasinngornermi, friteknikkerluni ataatsikkut aallarluni 15 kilometerimut unammisoqarpoq.
– Nalinginnaasumik friteknikkimi ingerlalluarnerusaraluarpunga, ullulussimavungali ullorlu taanna aamma pitsaanerpaanik sisoraateqarnanga. Taamaattumik paatsiveqarpianngitsumik aallarnerup kingorna arpannerliorpunga. Gruppilli kingusinnerulaartut ilaanni ingerlalluaqataavunga. Siuarsarniarneq ajornakusoorsimavoq, taamaattumik ulloq taanna naammaginaannarpoq, taanna oqarpoq.
Martin Møller ajugaasumit minutsinik pingasunik sekundinillu 30-nik kigaannerulluni apuuppoq.
– Maannakkorpiaq qasusuilluarpunga. Maanna Nuummi sungiusarpunga, marsip aallartinnerani Canadami World Cupimi unammiartoqqinnissama tungaanut. Tassani ulluni 12-ni arfineq-pingasoriarluta unammissaagut, taamaattumik angusarissaarnissamut periarfissarpassuaqarpoq, Martin Møller oqarpoq.