ujakkaarneq
Martin Møller aamma Uiloq Slettemark GM-imi pisassaanngitsut
Ujakkaartartut taakku ajugaallutik piffissamik angusarissaarput
Martin Møller aamma Uiloq Slettemark tamarmik NSP-meersut, unammisatik katallugit Nunatsinni ujakkaarluni pissartanngorniunnermi ullormi siullermi pisassaanatik ajugaapput.
Taakku ujaakkaartartut marluk siulliullutik apuuffissamut apuupput, aappaa angutini klassiskimi 15 kilometerinut arpannermi, appaalu arnat 10 kilometerimut arpanneranni.
Martin Mølleri angutit arpanneranni kisiartaalluni tunumoornaveeqummik sisoraatini taninniarnagit aalajangersimavoq - imaappoq kilometerini 15-ini marloriaammik ajaappiarsornerulluni - aamma qattunertigut sivingasukkut. Nunatsinni World Cupimut peqataasartut kisiartaannut tamanna iliuusissatsialaasimasoq erserpoq.
Ajugaaneq naammaginartoq
Martin Mølleri naammaginartummik ajugaavoq, tassani minutsit 46-t atorpai, ajugaasup tullianit Frederik Petersenimit ISP-meersumit, minutsit sisamat sinnerlugit sukkanerulluni.
Ajugaasut pingajuattut Øystein Slettemark NSP-meersoq malinnaavoq, minutsimik ataatsimik aamma sekundinik 13-inik kingulliulluni, kisianni sekundiniinnarnik arfinilinnik Klaus Egedemit sukkanerulluni.
Atuaruk: Martin Møller DM-imi pisassaanngilaq
Saqqumilaaqqittoq
50-nik ukiulik Uiloq Slettemark NSP-meersoq GM-imut tunngatillugu saqqumilaaqqippoq, tamanna ujakkaarluni Nunatsinni pisarsartanngorniunnermi ukiut 37-t matuma siorna peqataaqqaarnerata kingorna pivoq.
Uiloq Slettemark 10 kilometerit piffissami 37.15 arpappai, ukiunilu kingullerni arnat arpattartuisa pitsaanersaat, Niviaq C. Berthelsen NUP-meersoq, minutsinik marlunnik aamma sekundinik 43-nik siulliuffigaa.
Ajugaasut pingajoraat Arnatsiaq Rosing SSP-meersoq, taanna Niviaq Berthelsenimit minutsimik ataatsimik sekundinillu 46-nik kingulliuvoq.
Nukarliit
Nukarlerni unammisuni ajugaapput Nukappiannguaq Olsen (SSP), Aka Olsen (SSP), Hannah Olsen (ISP), Ukaleq Slettemark (NSP) aamma Bjarne Hansen (SSP).
Atuaruk: Martin Møller sæsonimi aatsaat taama angusarissaartigisoq
Utoqqasaat
Utoqqasaat unammineranni ajugaapput Poul Petersen (NSP), Kristian Kreutzmann (SSP), Bernhardt Olsen (ISP), Hans W. Kreutzmann (KS-69), Ramo Lennert (SSP), Frederikke L. Josefsen (KS-69), Merete Clasen (SSP), Bodil Karlshøj Poulsen (NSP) aamma Lise J. Heilmann (KS-69).
Unammiuaarnermi ullormi arpaffiuumi Maniitsoq seqinnarippoq, nutaamik aputeqarluni aamma anoreqarani.
Inernerit sinneri talerpiata tungaani takukkit.