nunat avannarliit
Martin Breum: Kikkut tamat oqartussaaqataanerat ataqqineqartariaqarpoq
- Issittumi susoqarpiarnersoq ajoraluartumik inuit ikitsuinnaat nalulunngilaat, aalajangiisussanummi periarfissaasunik isummersoqataasoqarnissaanut pisariaqartitsisoqarpoq, Martin Breum oqarpoq
Nunat avannarliit inuussutissarsiornikkut tunngasunik ataatsimoorneranni tusagassiortoq atuakkiortorlu Martin Breum oqalugiartinneqarpoq.
Kalaallit Nunaanni aatsitassarsiorneq pillugu atuakkiaa pingasunngormat saqqummerpoq.
Issittumi susoqavinnersoq paasisassarsiorniarlunilu tusagassiiniarnini pissutigalugu DR2mi Deadlinemi tusagassiortuujunnaarpoq.
- Issittumi paasiniagassat pillugit suliariniarlugit DR2mi atorfeqarunnaarpunga. Kalaallit Nunaanni nunaqarfissut paasitikkusuppakka nunaanni susoqavinnersoq, Martin Breum oqalugiareerluni Sermitsiaq.AGmut oqarpoq.
Sammineqartut assigiinngitsut
Kalaallit Nunaanni Danmarkimilu oqallisigineqartartut ilaatigut pillugit saqqummiivoq. Isumaqarpoq pingaarutilinni aalajangiisoqalernerani innuttaasut ilisimatinneqarluaqqaarsimassasut. Kikkut tamat oqartussaaqataanerannik innarliinnginnissaq pingaartippaa, taamaattoqarpat ajornartorsiuteqartoqartoqassasoq oqaatigalugu.
Martin Breumip saqqummiinermini paasinartumik nassuiarpaa Issittumi sikuerukkiartornera ilutigalugu pissutsit allanngoriartortut nunarsuatsinni.
Danmarkip Issittumi pisunik soqutiginnikkiartuinnarnera aamma ilannguppaa.
- Politikkerit, inuussutissarsiuteqartut assigiinngitsullu aalajangiisarput amerlasoorpassuarnik Issittoq pillugu. Inuinnaalli amerlasuut susoqarpiarnersoq ilisimaneq ajorpaat. Taamaattumik kikkut oqartussaaqataanerat tassuuna eqqorneqarpoq.
Atuakkap atuarnissaannik innersuussutigineqarpoq - Balladen om Grønlandimik qulequtaqarpoq.
Atuakkiarineqartoq pillugu Sermitsiami tigulaarinnittoqarnikuuvoq, taanna septembarip tallimaani saqqummerpoq. Assit ataanni aviisi pisiarineqarsinnaavoq: