atorfittaarneq
Marthap pisortatut atorfik pillugu: - Qilanaarpunga
Isumaginninnermut naalakkersuisuusimasoq, Martha Lund Olsen, Kommuneqarfik Sermersuumi Meeqqanut Ilaqutariinnullu Ingerlatsivimmi pisortatut atorfittaarnini nuannaarutigaa.
- Kommuneqarfik Sermersuumik nakkutilliinermi nalunaarusiami saqqummeqqammersumi takuneqarsinnaavoq isumaginninnermut tunngasunik suliaqarnermi allaffissornikkut aqutsineq pitsanngorsaaviginiartariaqartoq. Taamaattumik kommunimi meeqqat atugarissaannginnerpaat isumagineqarnissaat pillugu ingerlatsivimmi sulisut kajumissaarnissaannut aqqutissiuunnissaannullu qilanaarpunga, Martha Lund Olsen kommunip nittartagaani oqarpoq.
Borgmesteri naammagisimaarinnittoq
Borgmester Asii Chemnitz Narup (IA), Siumumi politikeri Martha Lund Olsen kommunimut qinersinermi unammillertigeqqamisani pillugu ima oqarpoq:
- Marthap suliaminut piginnaaneqarluartuunera, ilisimasaqarluartuunera inuiaqatigiinnilu atugarissaannginnerusunik sullissinermi uummateqarluarluni pikkorilluinnartuunera ilisarisimajuaannarpara. Ukiuni kingullerni politikkikkut akerleriittarsimavugut, taamaakkaluartorli peqataarusussuseqartuarnera usorsisimaarutigiuaannarpara. Nuannaarutigeqaara Martha Lund Olsenip ilaqutariit meeqqallu atugarissaannginnerusut pillugit suliassaqarfik uagut peqatigaluta kivitseqataaffigerusummagu, annertuumillu ineriartortitsinissamut pilersaarutip atuutsikkiartuaarnissaa siuttuuffigerusummagu.
Aamma atuaruk: Martha Lund Olsen Sermersuumi isumaginninnermut pisortanngussaaq
Decembarip aallaqqaataani Martha Lund Olsen atorfininnissaa naatsorsuutigineqarpoq, ullormilu tassani atorfimmi pisortaagallartoq, Helene Horsbrugh, atorfimmi pilersinneqaqqammersumi Meeqqanut Ilaqutariinnullu Ingerlatsivimmi ineriartortitsinermut pisortatut atorfinissaaq, taamaalillunilu isumaginninnermut pisortamut qanimut attaveqassalluni.
Atorfinitsitsinissamut ataatsimiititaq isumaqatigiittoq
Atorfinitsitsinissamut ataatsimiititaliami ilaasortat isumaqatigiissut nalilerpaat atorfimmut piukkunnarnerpaajusoq, tusagassiuutinut nalunaarummi tamanna ilisimatitsissutigineqarpoq.
Martha Lund Olsenip atorfittaarnermini kommunimi qinikkatut atorfeqarsinnaanngilaq. Kommunalbestyrelsimut ilaasortaajunnaassaaq, upernaakkullu 2018-imi Inatsisartut ataatsimiinnerisa aallartinnginnerani ilaasortaajunnaarnissaa naatsorsuutigineqarpoq. Decembarip aallaqqaataani atorfininnissaa ukiakkut ataatsimiinnermi ullup suliffiusoq kingulleq, tassa novembarip 16-at sioqqutilaarpaa.