meeqqat atugarliortut
Martha Lund Olsenip pilersaarutaanut Sermersooq toqqissisimanngitsoq
Martha Lund Olsenip (S) isumaginnittoqarneq pillugu inatsisitigut siunnersuutaani isoqanngitsunik amerlasuunik suli peqarpoq, Kommuneqarfik Sermersuumi borgmesteri Asii Chemnitz Narup (IA) isumaqarpoq
Ilaqutariinnermut, naligiissitaanermut, isumaginninnermut inatsisinullu atortitsinermut naalakkersuisup, Martha Lund Olsenip (S) inatsisissatut siunnersuutaaa Kommuneqarfik Sermersuumit isornartorsiorneqarpoq.
Siunnersuutip imaraa, kommunit isumaginninnermut suliassat kivissinnaanngippatigit, Namminersorlutik Oqartussat aqutsinermik tigusinissamut pisinnaatitaaffeqarnerulissasut.
Nalilerneqarnissaanik suliaqartut
Kommuneqarfik Sermersooq Martha Lund Olsenip pilersaarutaanut suli toqqissisimanngissuteqarput, tassalu kommunip isumaginnittoqarfia qaninnerusumik tunngavilersuuteqarfiginagu Namminersornerusunut isumaginnittoqarfimmik tigusinissaannut pisinnaatimmagu.
Taamaattumik kommuni inatsisissamut siunnersuummut suliaq inatsisilerituunit nalilerneqarnissaanik suliaqarsimapput, taannalu taaneqartartoq second opinion Naalakkersuisunut aamma ataatsimiititamut tassunga naleqquttumut maanna nassiunneqarpoq.
Unioqqutitsinermi akuliuffigineqarsinnaanngorlugit
- Inatsisitigut siunnersuutit tunuisigut ajortunik eqqarsaateqartoqarnissaanik isumaqassallunga pissutissaqanngilanga, kisianni tunngavilersuutinik tunniusseqqaaratik Naalakkersuisut kommuni allaffissornerup ataanut inissinniarneqarpoq. Siorasaarineq taamaattoq kommunini inooqataaffigisinnaanngilarput, Kommuneqarfik Sermersuumi borgmesteri Asii Chemnitz Narup tusagassiuutinut nalunaarummi allappoq.
Taamaammat Sermersooq malitassanik ataatsinik suliaqartoqarnissaanik innersuussuteqarpoq, tassalu kommunit inerteqqutaasumik iliorsimatillugit aatsaat akuliuffigineqarnissamut aalajangersakkamik aalajangersimasumik peqassasoq.
Pissaaneqartitsivallaartoq
Inatsimmummi siunnersuutaasoq ullumikkutut isikkoqartillugu Kommunit aalajangiinermut naammagittaalliornissamut aamma periarfissaqanngilaq, aalajangiinermut naapertuutinngitsoqartillugu allanngortinnissaanut kommunit eqqartuussivikkut allanngortitsisinnaanngillat.
- Inatsisissatut siunnersuut taanna Naalakkersuisunut ataasiakkaanut pisaanermik annertuallaamik tunisivoq. Siunertarineqartut malillugit sanngiinnerpaat ikiorneqarnissaat qularinngilara, kisianni kommunini sulisut politikerillu akornanni nalornineq kimulluunniit iluaqutaanavianngilaq, Asii Chemnitz Narup oqarpoq.
Atuaruk: Meeqqat pillugit siunnersuut MIO-mit tapersersorneqarpoq