DK-mi suleriaatsit
Martha Lund Olsenip Danmarkimut paasisassarsiorniarluni angalanissani pilersaarutigaa
Ilaqutariinnermut, Naligiissitaanermut Isumaginninnermullu Naalakkersuisunngortoqqittoq Siumumit Martha Lund Olsen Nunatta aaqqissuussaanerata pitsanngorsarnissaa anguniarlugu Danmarkimut paasisassarsiorniarpoq
Danmarkimut paasisassarsiorniarluni angalanissaminik pilersaaruteqarluni Ilaqutariinnermut, Naligiissitaanermut Isumaginninnermullu Naalakkersuisoq Siumumit Martha Lund Olsen Tusagassiivimmut oqarpoq.
- Danmarkimi qanoq suleriaaseqartoqartarnersoq paasiniarlugu aallassaanga. Suleriaatsivut pitsanngorsarniarlugit paasisassarsiussaanga, Martha Lund Olsen Tusagassiivimmut oqarpoq.
Innuttaasunik sullissisarnerit pitsanngorsarneqarnissaannik sulinissaq Martha Lund Olsenip oqaatigaa.
- Danmarkimi innuttaasunut sullissisarnerat qanoq ingerlanneqartarnersoq paasiniassavara. Isumaginninnermi sullissinerup pitsanngorsarnissaa pingaartipparput. Suliassanik nalunaaruteqartillugu qanoq sukkanerusumik sulisoqarsinnaalernissaa pillugu aamma paasisassarsiussaanga, tassani soorlu meeqqanut sullissinerit eqqarsaatigaakka.
- Eqaannerusumik sullissisoqartalernissaanut atortorissaarutit atorneqarsinnaanerat pillugu aamma periarfissat misissuiffigineqassapput, taamaasilluni sullissisut sukkanerusumik aamma sulisinnaanissaat eqqarsaatigalugu.
Danmarkimi isumaginninnermut sullissinerat Nunatsinnit allaanerunera aamma Martha Lund Olsenip oqaatigaa.
- Assersuutigalugu Canadami isumaginninnikkut sullissineq uagutsinnit Danmarkimiillu allaaneroqaaq. Nunanit allanit aamma periaaserineqartut paasissallugit pingaaruteqarput, kisianni Danmarkimi misilittagarineqartut paasisaqarfigissallugit salliutissavagut, oqarpoq.