atorfittaarneq
Martha Lund Olsen Sermersuumi isumaginninnermut pisortanngussaaq
Siumumi politikeri Martha Lund Olsen qinikkatut sulinermik tunuarnialerpoq. Taanna Kommuneqarfik Sermersuumi Meeqqanut Ilaqutariinnullu Ingerlatsivimmi pisortatut atorfimmut qinnuteqarsimavoq, decembarillu aallaqqaataani atorfinissalluni, Sermitsiaq.AG taama paasisaqarpoq.
Tupaallannartumik atorfimmik allannguinermi Martha Lund Olsenip kommunalbestyrelsemut ilaasortaajunnaartariaqarpoq, aappaagulu upernaakkut ataatsimiinnissaq sioqqullugu Inatsisartunit tunuarnissaa naatsorsuutigineqarpoq. Naalakkersuisuusimasup atorfinitsinneqarnissaanut aalajangerneq kommunimi Aningaasaqarnermut Inuussutissarsiornermullu ataatsimiititaliap sisamanngormat ataatsimiinnerani pivoq.
Taaguunneqarnerpaat tulliusoq
Tusagassiutini aamma inuit amerlanerit nalilerpaat, IA-mit borgmesteri Asii Chemnitz Narup apriilimi kommunimut qinersinermi Siumumit unammillersinnaassagaa. Kisianni borgmesterissatut Siumumit sassartitatut oqaatigineqanngilaq.
Martha Lund OIsen kommunimut qinersinermi taaguunneqarnerpaat tulliuvoq, 482-inik taaguunneqarluni, tamanna Asii Chemnitz Narupip qinigaalluarneranut naammannani, borgmesteriusoq 2.259-nik taaguunneqarpoq. Martha Lund Olsen peqataanerani Siumut 7,4 procentpointinik kinguariaateqarpoq.
Kommunimut qinersisoqarnera sioqqullugu Kim Kielsenip Martha Lund Olsen attaveqarnermut naalakkersuisutut soraarsippaa. Kommunimut qinigassanngortinnissaminut pilersaaruteqarnera, partiimi siulittaasup soraarsitsinermut tunngaviunerarpaa, tamannalu taassuma isaanit naalakkersuisutut sulinermut tamakkiisumik aallussinnginnermik isumaqarami.
Kissaatigisaminit peerneqartoq
Kisianni siornali ukiakkut naalakkersuisoqatigiit allanngorneranni Kim Kielsenip isumaginninnermut naalakkersuisuuffigerusutaanit peerpaa, IA-mi siulittaasumut Sara Olsvigimut tunniunniarlugu. Taanna naalakkersuisuuffik Aleqa Hammond 2013-imi siulittaasunngormat Martha Lund Olsenip akisussaaffigilernikuuaa.
Isumaginninnermut pisortaq nutaaq illoqarfiup pingaarnersaata kommuniani suliassarpassuaqassaaq, aqutsisoqarfillu kommunip missingersuutaani akisunerpaajuvoq. Kommunip katillugu teknikkikkut allaffissornikkullu missingersuutaani isumaginninnermut tunngasut pingajorarterutaasa missaanniipput.
Kommuneqarfik Sermersooq nunamit namminermit naalakkersuisoqarfimmit juunip arfineq-aappaanni meeqqat sumiginnakkat pillugit suliani kommuni annertuumik isornartorsiorneqarpoq. Nalunaarusiap saqqummiunneqarnera sioqqullugu isumaginnittoqarfimmi ajornartorsiutit annertusut kommuni paasitinneqarpoq.
Ingerlatsivik marlunnut avinneqartoq
Tamanna tunuliaqutigalugu kommunip meeqqanut inuusuttunullu ingerlatsivik marlunnut avippaa, aappaa isumaginninnikkut sulianik suliaqassalluni. Taannalu ingerlatsivik, – Meeqqanut Ilaqutariinnullu – Martha Lund Olsenip pisortaaffigilissavaa.
Kommunalbestyrelsimut qinikkat meeqqap pillugit suliat tukannerujussuat aaqqinniarlugu annertuumik pilersaarusiorput, Martha Lund Olsenillu taanna anguneqarnissaanut aqutsisussanngorpoq.
Atorfik kissaatigisaa
Atorfinitsinneqarneq sammisat attuumassuteqarfiginerpaasaanut Martha Lund Olsenimut alloriarneq pingaaruteqarpoq. Upernaakkut kommunimut qinersinermi sassarusunnera, inuiaqatigiinni ikorfartorneqarnerusarialinnut tunngasunut aalajangiinernut qanillerusunnermut kissaateqarnerusoq, Sermitsiaq.AG-mut taamani nassuiaateqarpoq. Qinikkatut atorfeqalinnginnermini inunnik isumaginninnermut siunnersortitut ilinniarsimasoq Kommune Kujallermi isumaginninnermut pisortaavoq.
Martha Lund Olsen CV-mini aqutsinermut ilinniarsimasuuvoq, Ilisimatusarfimmilu isumaginninnermut siunnersortinngorniartunut ilinniartitsisuusimalluni.